მამალაძე: „ჩვენს ხალხებს შორის მეგობრობა ენობრივ, რელიგიურ და ეთნიკურ განსხვავებებზე მაღლა დგას“

სტრატეგიული დაგეგმვის ცენტრის ხელმძღვანელმა, პოლიტოლოგმა ლევან მამალაძემ განაცხადა, რომ აზერბაიჯანსა და საქართველოს შორის ურთიერთობებმა ინტეგრაციის შესაძლო უმაღლეს დონეს მიაღწია. მან ხაზი გაუსვა ორ ქვეყანას შორის ისტორიულ მემკვიდრეობასთან, ენასთან, ეთნიკურ საკითხებსა და საზღვრებთან დაკავშირებული სადავო თემების მეცნიერული კვლევების საფუძველზე გარკვევის მნიშვნელობას. მამალაძემ ამის შესახებ 24News.ge-ს საინფორმაციო პორტალთან ინტერვიუში ისაუბრა, თბილისში გამართული მრგვალი მაგიდის დისკუსიის შემდეგ, რომლის თემა იყო „საქართველო–აზერბაიჯანი: სტრატეგიული პარტნიორობა და საერთო მომავალი“. პოლიტოლოგის თქმით, აზერბაიჯან-საქართველოს ურთიერთობების საფუძველი თავის დროზე გარდაცვლილმა პრეზიდენტებმა, ჰეიდარ ალიევმა და ედუარდ შევარდნაძემ ჩაუყარეს და ეს ურთიერთობები დღესაც ვითარდება. მამალაძე მიიჩნევს, რომ ორ ქვეყანას შორის ისტორიული მემკვიდრეობა და სხვა მგრძნობიარე საკითხები არ უნდა იქცეს ვინმეს პოლიტიკური სპეკულაციების საგნად და ისინი მეცნიერულად უნდა შეისწავლონ მეცნიერებმა და აკადემიური წრეების წარმომადგენლებმა. „ჩვენს ქვეყნებს შორის უკვე ძალიან დიდი სამუშაოა გაწეული. ორ ქვეყანას შორის შესაძლო ინტეგრაციის ყველაზე მაღალი დონე სწორედ აზერბაიჯანსა და საქართველოს შორის არსებობს. ამ ურთიერთობების საფუძველი თავის დროზე ჰეიდარ ალიევმა და ედუარდ შევარდნაძემ ჩაუყარეს და დღესაც ვითარდება.“ თუმცა, მინდა ხაზი გავუსვა ერთ ძალიან მნიშვნელოვან საკითხს: ჩვენს ქვეყნებს შორის ისტორიულ ძეგლებთან, ენასთან, ეთნიკურ საკითხებსა და საზღვრებთან დაკავშირებული გაურკვეველი თემები არ უნდა დავტოვოთ ვინმეს სპეკულაციის საგნად. რადგან, პირდაპირ რომ ვთქვათ, კავკასიაში მშვიდობა აზერბაიჯანსა და საქართველოს შორის ურთიერთობებზე გადის. ჩვენს გარშემო მრავალი ძალაა, რომლებიც ამ ურთიერთობების დარღვევასა და ვითარების არევას ცდილობენ. ამიტომ აკადემიური წრეების წარმომადგენლები და მეცნიერები უნდა შეიკრიბონ და ყველა საკითხი მეცნიერულად შეისწავლონ. იქნება ეს აზერბაიჯანში არსებული ეკლესიები თუ საქართველოში არსებული მუსლიმური სალოცავები, ყველაფერი უნდა გაირკვეს. მე ვერანაირ პრობლემას ვერ ვხედავ იმაში, რომ აზერბაიჯანის ტერიტორიაზე ქართული ისტორიული მემკვიდრეობა, ხოლო საქართველოს ტერიტორიაზე აზერბაიჯანული და სხვა კულტურების ძეგლები არსებობს. იგივე მიდგომა ეთნიკურ ჯგუფებთან ურთიერთობებშიც უნდა იქნას გამოყენებული და ყველა საკითხი ნათელი უნდა გახდეს. ეს საკითხები მეცნიერებამ უნდა გადაწყვიტოს და არა ვინმეს სურვილმა ან ნებამ. ამას ასე ავხსნიდი: ჩვენს ხალხებს შორის ნათესაური კავშირის საფუძველი იმდენად ძლიერია, რომ ეს კავშირი ენაზე, რელიგიასა და ეთნიკურ განსხვავებებზე მაღლა დგას. ამას ისტორიაც განსაზღვრავს. ჩვენ, ასე რომ ვთქვათ, საერთო გენეტიკური პასპორტი გვაქვს. მეცნიერული და ლაბორატორიული კვლევების თვალსაზრისით, დადასტურებულია, რომ საქართველოსა და აზერბაიჯანის მოსახლეობის 80 პროცენტზე მეტი ნათესაურ კავშირშია. გასაყოფი არაფერი გვაქვს. შეგვიძლია ყველაფერს თავისი ისტორიული სახელი განვუსაზღვროთ და სადავო საკითხების წარმოშობა თავიდან ავიცილოთ. ეს ურთიერთობები უნდა შევინარჩუნოთ. უფრო მეტიც, მიმაჩნია, რომ უნდა შეიქმნას კავკასიის თანამშრომლობის ცენტრი, რათა არავის მიეცეს რეგიონში ვითარების დაძაბვისა და მხარეების ერთმანეთის წინააღმდეგ დაპირისპირების შესაძლებლობა. აზერბაიჯან-საქართველოს ურთიერთობები კავკასიაში სტაბილურობის ერთ-ერთი მთავარი საყრდენია. ჩვენ ამ ნათესაური და მეგობრული ურთიერთობებიდან გამომდინარე, ჩვენი სამომავლო პერსპექტივებიც უნდა დავიცვათ“, — აღნიშნა ლევან მამალაძემ.

www.24news.ge

მამალაძე: „ჩვენს ხალხებს შორის მეგობრობა ენობრივ, რელიგიურ და ეთნიკურ განსხვავებებზე მაღლა დგას“

სხვა სიახლეები