სასამართლომ მტკიცებულებად არ მიიღო ღარიბაშვილის მიერ მამუკა მდინარაძის შესახებ დაწერილი წერილი

სასამართლომ საქართველოს ყოფილი პრემიერ-მინისტრის, ირაკლი ღარიბაშვილის, ერთ-ერთი საჯაროდ გავრცელებული განცხადება განსახილველ მტკიცებულებათა შორის არ შეიტანა. შესაბამისი გადაწყვეტილება მოსამართლე ლელა კალიჩენკომ მიიღო. 24News.ge-ის ინფორმაციით, დღეს გამართულ სასამართლო სხდომაზე, სადაც მტკიცებულებების დასაშვებობის საკითხს განიხილავდნენ, ადვოკატებმა მოითხოვეს, ირაკლი ღარიბაშვილის ერთ-ერთი წერილი მტკიცებულების სახით საქმის მასალებს დამატებოდა. საუბარია წერილზე, რომელშიც ღარიბაშვილი მამუკა მდინარაძეზე საუბრობს. მოსამართლე ლელა კალიჩენკოს განმარტებით, აღნიშნული მასალა მტკიცებულებების დასაშვებობის კრიტერიუმებს არ აკმაყოფილებდა. მოსამართლემ განაცხადა, რომ როდესაც ინფორმაცია საჯარო სივრცეში განთავსებულია და შესაძლო დანაშაულის ნიშნებს შეიცავს, აღნიშნულ ინფორმაციაზე რეაგირება და მისი გამოძიება საგამოძიებო ორგანოების კომპეტენციას განეკუთვნება. აღსანიშნავია, რომ თავდაცვის ყოფილმა მინისტრმა ჯუანშერ ბურჭულაძემ და მისმა ნათესავმა, მსჯავრდებულმა ვასილი მხეიძემ, ირაკლი ღარიბაშვილის წინააღმდეგ ჩვენებები მისცეს. მათი ჩვენებების თანახმად, შესყიდვების, შესაბამისი გარანტიებისა და მფარველობის სანაცვლოდ, ბურჭულაძემ ქრთამის სახით მიღებული 1 მილიონ 500 ათასი ლარიდან 750 ათასი ლარი ღარიბაშვილს ხელზე გადასცა, დარჩენილი 750 ათასი ლარი კი თავად დაიტოვა. ბრალდების მხარის ინფორმაციით, აღნიშნული ქმედებების შედეგად სახელმწიფოს 6 მილიონ 985 ათას 255 ლარის ოდენობის მატერიალური ზიანი მიადგა და მნიშვნელოვანი ზიანი მიადგა საჯარო ინტერესებს. პროკურატურამ ირაკლი ღარიბაშვილს ბრალდება სისხლის სამართლის კოდექსის 338-ე მუხლის მეორე ნაწილის „ა“ და „გ“ ქვეპუნქტებით, ასევე მესამე ნაწილის „ე“ ქვეპუნქტით წარუდგინა. აღნიშნული მუხლები ითვალისწინებს სახელმწიფო-პოლიტიკური თანამდებობის მქონე პირის მიერ, წინასწარი შეთანხმებით მოქმედ პირთა ჯგუფის მიერ, განსაკუთრებით დიდი ოდენობით ქრთამის აღებას და სასჯელის სახით 11-დან 15 წლამდე ვადით თავისუფლების აღკვეთას. შეგახსენებთ, რომ ირაკლი ღარიბაშვილი განსაკუთრებით დიდი ოდენობით უკანონო შემოსავლის ლეგალიზაციის საქმეზეა მსჯავრდებული. საპროცესო შეთანხმების საფუძველზე მას 5 წლით თავისუფლების აღკვეთა მიესაჯა და 1 მილიონი ლარის ოდენობით ჯარიმა დაეკისრა.

www.24news.ge

სასამართლომ მტკიცებულებად არ მიიღო ღარიბაშვილის მიერ მამუკა მდინარაძის შესახებ დაწერილი წერილი

სხვა სიახლეები