კობახიძემ და ფეზეშქიანმა ერევანში გამართულ შეხვედრაზე განხილული საკითხები გაასაჯაროვეს

ერევანში საქართველოს პრემიერ-მინისტრ ირაკლი კობახიძესა და ირანის პრეზიდენტ მასუდ ფეზეშქიანს შორის შეხვედრა გაიმართა. მხარეებმა ორმხრივი ურთიერთობები, ეკონომიკისა და ტურიზმის სფეროებში თანამშრომლობა, ასევე ახლო აღმოსავლეთში არსებული ვითარება განიხილეს. 24News.ge-ის ინფორმაციით, შეხვედრა გაეროს ბიოლოგიური მრავალფეროვნების შესახებ კონვენციის მხარეთა კონფერენციის მე-17 სესიის (COP17) ფარგლებში გაიმართა. საქართველოს პრემიერ-მინისტრმა შეხვედრასთან დაკავშირებით სოციალურ ქსელში პოსტი გამოაქვეყნა და განაცხადა, რომ მხარეებმა საქართველოსა და ირანს შორის ორმხრივი ურთიერთობები, ასევე ახლო აღმოსავლეთში არსებული ვითარება განიხილეს. კობახიძემ ხაზი გაუსვა, რომ საქართველო მტკიცედ უჭერს მხარს რეგიონში არსებული კონფლიქტების მშვიდობიანი გზით მოგვარებისკენ მიმართულ დიპლომატიურ ძალისხმევას. ირანის პრეზიდენტის ადმინისტრაციის მიერ გავრცელებული ინფორმაციის თანახმად, მასუდ ფეზეშქიანმა აღნიშნა, რომ ორ ქვეყანას შორის მზარდი ეკონომიკური, კულტურული და ტურისტული ურთიერთობების პრაქტიკულ თანამშრომლობად გარდაქმნა მნიშვნელოვანია. მისი თქმით, თეირანსა და თბილისს შორის ერთობლივი ინიციატივების განსახორციელებლად აუცილებელია მკაფიო და გამჭვირვალე ჩარჩოებისა და კონკრეტული სამოქმედო გრაფიკის განსაზღვრა. შეხვედრის დროს ფეზეშქიანი აშშ-ის მიერ ირანის წინააღმდეგ დაწესებულ სანქციებსაც გამოეხმაურა. მან ეს ზომები ჰუმანიტარულ პრინციპებთან შეუსაბამოდ შეაფასა, ხოლო ირანის წინააღმდეგ განხორციელებულ ბოლო თავდასხმებს უსაფუძვლო და არაადამიანური ქმედებები უწოდა. ირანის პრეზიდენტმა განაცხადა, რომ მისი ქვეყანა ბირთვული იარაღის შექმნას არ ცდილობს და ირანის წინააღმდეგ მიმართულ პროპაგანდისტული ხასიათის ბრალდებებს უარყო. მან ხაზი გაუსვა, რომ თეირანი ყოველთვის მზად არის დიალოგისთვის, თუმცა ზეწოლას არ დაემორჩილება. ირანის პრეზიდენტის ადმინისტრაციის ინფორმაციით, ირაკლი კობახიძემ განაცხადა, რომ საქართველოს მეზობელ ქვეყნებთან მიმართებით მკაფიო პოზიცია აქვს და მათი საშინაო საქმეებში ნებისმიერი უცხოური ჩარევის წინააღმდეგია. პრემიერმა ყურადღება გაამახვილა ორ ქვეყანას შორის არსებულ გეოგრაფიულ და კულტურულ კავშირებზე და აღნიშნა, რომ მნიშვნელოვანია ორმხრივი ურთიერთობების განვითარება მეგობრობისა და თანამშრომლობის პრინციპებზე დაყრდნობით. კობახიძემ ასევე იმედი გამოთქვა, რომ ორი ქვეყნის საგარეო საქმეთა სამინისტროებსა და დიპლომატიურ სამსახურებს შორის კოორდინაცია ხელს შეუწყობს ეკონომიკური თანამშრომლობისა და ტურიზმის სფეროებში საერთო ინტერესების განსაზღვრას. მასუდ ფეზეშქიანმა შეხვედრასთან დაკავშირებით სოციალურ ქსელში პოსტი გამოაქვეყნა და ხაზი გაუსვა, რომ ორ ქვეყანას შორის ურთიერთობების განვითარებისთვის აუცილებელია მკაფიო და გამჭვირვალე ჩარჩოების შექმნა.

www.24news.ge

კობახიძემ და ფეზეშქიანმა ერევანში გამართულ შეხვედრაზე განხილული საკითხები გაასაჯაროვეს

სხვა სიახლეები