„ოპოზიციურმა ალიანსმა“ ფართომასშტაბიანი საპროტესტო აქციების გამართვა დააანონსა

„ოპოზიციურმა ალიანსმა“ განაცხადა, რომ 25 ოქტომბერს თბილისში საპროტესტო კამპანიას დაიწყებს. ცნობილია, რომ კამპანია 28 ნოემბერს ფართომასშტაბიანი აქციით დასრულდება. 24News.ge-ის ინფორმაციით, „კოალიცია ცვლილებებისთვის“ ერთ-ერთი ლიდერის, ნიკა გვარამიას განცხადებით, ალიანსი პროტესტს გააგრძელებს როგორც ბათუმის სასამართლო დარბაზებში, ისე თბილისის ქუჩებში. „ჩვენ ყველგან ვიქნებით — ბათუმის სასამართლო დარბაზებში და, რაც მთავარია, თბილისის ქუჩებში. ყველაფერს უშიშრად და მტკიცედ გავაპროტესტებთ. ჩვენი მთავარი მოთხოვნა კი ივანიშვილის გარეშე საქართველოს არსებობაა“, — განაცხადა გვარამიამ. ალიანსის ინფორმაციით, 25 ოქტომბერს, 19:00 საათზე, თბილისის სახელმწიფო უნივერსიტეტის პირველი კორპუსის წინ შეიკრიბებიან და ერთობლივ კამპანიას დაიწყებენ. კამპანიის მიზანი 28 ნოემბერს დედაქალაქში ფართომასშტაბიანი აქციის გამართვაა. ნიკა გვარამია პარტიების გაუქმების საკითხსაც შეეხო და განაცხადა, რომ ოპოზიციისთვის მთავარი პრობლემა თანამდებობების დაკარგვა კი არა, ქვეყანაში დემოკრატიის შეზღუდვაა. მისი თქმით, ხელისუფლებამ არჩევნები და ქვეყანა მიითვისა. მიუხედავად იმისა, რომ ოპოზიციის წარმომადგენლები თანამდებობებზე ნებაყოფლობით ამბობენ უარს, მიიჩნევენ, რომ ქვეყანაში მიმდინარე მოვლენები საქართველოს დემოკრატიულ მომავალს საფრთხეს უქმნის. გვარამიას განცხადებით, ქვეყანაში მიმდინარე მოვლენები ზიანს აყენებს მოქალაქეების სურვილს, გახდნენ ევროპული ოჯახის სრულუფლებიანი წევრები, ბავშვების შესაძლებლობას, მიიღონ ხარისხიანი განათლება, ხანდაზმულების უფლებას, ისარგებლონ ხარისხიანი ჯანდაცვის მომსახურებით, ხოლო პენსიონერების უფლებას, მიიღონ მაღალი პენსია. მან ასევე ხაზი გაუსვა ისეთ პრობლემებს, როგორიცაა სურსათზე დაბალი ფასები, რეგიონების განვითარება, ფერმერების ბაზრებზე წვდომა და მოქალაქეების შესაძლებლობა, საკუთარ ქვეყანაში ღირსეული ცხოვრებით იცხოვრონ. ოპოზიციის ლიდერმა განაცხადა, რომ ჟურნალისტების სიტყვის თავისუფლება შეზღუდულია, ხოლო სამოქალაქო საზოგადოების წარმომადგენლებს პოლიტიკურ ცხოვრებაში მონაწილეობის შესაძლებლობა წართმეული აქვთ. მან ასევე აღნიშნა, რომ საქართველოს ფერმერების რუსეთის ბაზარზე დამოკიდებულ მდგომარეობაში დარჩენა ქვეყნისთვის სერიოზულ პრობლემას წარმოადგენს. გვარამიას თქმით, 2024 წლის 25–26 ოქტომბერს განვითარებული მოვლენები ოპოზიციისთვის თანამდებობების ჩამორთმევა კი არა, „ქართული ოცნების“ მიერ ქვეყნის მითვისება იყო. „ჩვენ გვინდა საქართველო ივანიშვილის გარეშე, გვინდა დავიბრუნოთ ევროპა, სამართლიანობა და კეთილდღეობა. საქართველოს მოქალაქეებს საკუთარ სამშობლოში ბედნიერად ცხოვრების შესაძლებლობა უნდა ჰქონდეთ. სწორედ ამიტომ, ვაცხადებთ, რომ დიდ კამპანიას ვიწყებთ. 25 ოქტომბერს, 19:00 საათზე, ყველას თბილისის სახელმწიფო უნივერსიტეტის პირველი კორპუსის წინ გელოდებით. ეს თითოეული ჩვენგანის დღეა. ჩვენ ყველას გვართმევენ ჩვენს სამშობლოს“, — განაცხადა ნიკა გვარამიამ.

www.24news.ge

„ოპოზიციურმა ალიანსმა“ ფართომასშტაბიანი საპროტესტო აქციების გამართვა დააანონსა

სხვა სიახლეები