რუსეთი საქართველოსგან აფხაზეთისა და სამხრეთ ოსეთის წინააღმდეგ ძალის გამოუყენებლობის გარანტიას მოითხოვს

რუსეთის საგარეო საქმეთა სამინისტრომ განაცხადა, რომ საქართველომ აფხაზეთისა და სამხრეთ ოსეთის წინააღმდეგ ძალის გამოუყენებლობის გარანტიები უნდა გასცეს და აუცილებელია ე.წ. საზღვრების დელიმიტაციისა და დემარკაციის პროცესის დაწყება. 24News.ge-ის ინფორმაციით, ამის შესახებ რუსეთის საგარეო საქმეთა სამინისტროს ოფიციალურ განცხადებაშია აღნიშნული. რუსეთის საგარეო საქმეთა სამინისტროს ინფორმაციით, 9 ოქტომბერს მინისტრის მოადგილემ, მიხეილ გალუზინმა, სამხრეთ კავკასიაში უსაფრთხოებისა და სტაბილურობის საკითხებზე საერთაშორისო დისკუსიების თანათავმჯდომარეებთან ვიდეოკონფერენციის ფორმატში შეხვედრა გამართა. შეხვედრაში მონაწილეობდნენ გაეროს გენერალური მდივნის თანაშემწე, ეუთოს მოქმედი თავმჯდომარის სპეციალური წარმომადგენელი სამხრეთ კავკასიაში და სამხრეთ კავკასიაში ევროკავშირის სპეციალური წარმომადგენელი. სამინისტროს განცხადებაში აღნიშნულია, რომ ნოემბერში დაგეგმილი მორიგი რაუნდისთვის მზადების ფარგლებში, მოლაპარაკებების დღის წესრიგში არსებული მნიშვნელოვანი საკითხები დეტალურად განიხილეს. რუსულმა მხარემ ხაზი გაუსვა აფხაზეთისა და სამხრეთ ოსეთის უსაფრთხოების უზრუნველყოფის მიმართულებით ძალისხმევის გაძლიერების აუცილებლობას. განცხადებაში აღნიშნულია, რომ პრაქტიკულ ნაბიჯებს შორის გათვალისწინებულია ოფიციალური თბილისის მიერ სოხუმისა და ცხინვალის წინააღმდეგ ძალის გამოუყენებლობის შესახებ გარანტიების გაცემა, ასევე საქართველო–აფხაზეთისა და საქართველო–სამხრეთ ოსეთის საზღვრების დელიმიტაციის პროცესის დაწყება. რუსეთის საგარეო საქმეთა სამინისტროს პოზიციის თანახმად, დელიმიტაციის შემდეგ დემარკაციის სამუშაოები უნდა ჩატარდეს.

www.24news.ge

რუსეთი საქართველოსგან აფხაზეთისა და სამხრეთ ოსეთის წინააღმდეგ ძალის გამოუყენებლობის გარანტიას მოითხოვს

სხვა სიახლეები