კობახიძე: „ქრისტიანობის სახელმწიფო რელიგიად გამოცხადებამ საქართველოს განვითარების გზა და ეროვნული იდენტობა განსაზღვრა“

პრემიერ-მინისტრმა ირაკლი კობახიძემ საერთაშორისო სიმპოზიუმზე „ღმერთი, სამშობლო, ადამიანი“ გამოსვლისას ხაზი გაუსვა ქრისტიანობის სახელმწიფო რელიგიად გამოცხადების 1700 წლისთავის მნიშვნელობას ქვეყნის ისტორიისა და ეროვნული იდენტობის თვალსაზრისით. 24News.ge-ის ინფორმაციით, პრემიერ-მინისტრმა განაცხადა, რომ საქართველო იმ იშვიათ ქვეყნებს შორისაა, სადაც სახარება ჯერ კიდევ I საუკუნეში ქრისტეს მოციქულების ქადაგების შედეგად გავრცელდა. მისი თქმით, 17 საუკუნის წინ ქრისტიანობის სახელმწიფო რელიგიად გამოცხადებასთან დაკავშირებულმა ისტორიულმა გადაწყვეტილებამ ქართველი ხალხის განვითარების გზა და თვითმყოფადობა განსაზღვრა. ირაკლი კობახიძის აღნიშვნით, საქართველოს მართლმადიდებელი ეკლესია საუკუნეების განმავლობაში ქვეყნის სულიერ საყრდენს წარმოადგენდა. „ჩვენი უდიდესი საერო და სასულიერო მოღვაწეების ძალისხმევა საუკუნეების განმავლობაში ამ მტკიცე საფუძვლის გაძლიერებისკენ იყო მიმართული. განსაკუთრებით დიდია ჩვენი დიდი პატრიარქის, ილია II-ის წვლილი თანამედროვე, დამოუკიდებელი სახელმწიფოს მშენებლობაში და ამ პროცესში ხალხის სულიერი ერთიანობის უზრუნველყოფის საქმეში უმაღლესი ქრისტიანული ღირებულებების საფუძვლად აღებაში.“ „სახელმწიფო განსაკუთრებულ პატივს მიაგებს ამ მარადიულ ღირებულებებს. ეკლესიასთან მჭიდრო თანამშრომლობის ფარგლებში მტკიცედ დავიცავთ იმ მემკვიდრეობას, რომელსაც ჩვენი ეროვნული ერთიანობა და განვითარება ეფუძნება“, – განაცხადა კობახიძემ. პრემიერ-მინისტრის თქმით, „ღმერთი, სამშობლო, ადამიანი“ ის ღირებულებებია, რომლებიც პატრიარქმა ილია II-მ მომავალ თაობებს უანდერძა. მან დადებითად შეაფასა ის ფაქტი, რომ საერთაშორისო სიმპოზიუმი სწორედ ამ თემას ეძღვნება და განიხილება ამ ღირებულებებს შორის არსებული კავშირები, ასევე მათი მნიშვნელობა თანამედროვე ცხოვრებაში. კობახიძემ სიმპოზიუმის ორგანიზატორებს, მეცნიერებს, სასულიერო პირებსა და ყველა სტუმარს მადლობა გადაუხადა. მან გამოთქვა რწმენა, რომ დღევანდელი დიალოგი და სამომავლო თანამშრომლობა მნიშვნელოვან წვლილს შეიტანს საყოველთაო ღირებულებების განმტკიცებაში. პრემიერ-მინისტრმა გამოსვლის დასასრულს ქრისტიანობის სახელმწიფო რელიგიად გამოცხადების 1700 წლისთავთან დაკავშირებით მილოცვა გამოთქვა და საერთაშორისო სიმპოზიუმის მუშაობას წარმატებები უსურვა.

www.24news.ge

სხვა სიახლეები