SOCAR-dan "Mamed Gas"a təklif məktubu göndərildi

Marneuli bələdiyyəsinin Qızılhacılı kəndində təbii qaz təchizatının davam etdirilməsi ilə bağlı SOCAR Georgia Gas şirkəti lisenziyası ləğv edilmiş Mamed Gas şirkətinə müraciət edib. 24News.ge xəbər portalının məlumatına görə, bu barədə “SOCAR Georgia Gas”ın “Mamed Gas”ın rəhbəri Nəriman Allahverdiyevə ünvanladığı məktubda bildirilib. Məktubda qeyd olunur ki, Gürcüstanın Energetika və Su Təchizatının Tənzimlənməsi üzrə Milli Komissiyasının 30 iyul 2026-cı il tarixli qərarına əsasən, “Mamed Gas” şirkətinin təbii qazın paylanması üzrə lisenziyası ləğv edilib və Qızılhacılı kəndinin abonentlərinin fasiləsiz və təhlükəsiz qaz təchizatının təmin edilməsi “SOCAR Georgia Gas” MMC-yə həvalə olunub. Bildirilib ki, abonentlərin qazla təminatı “Mamed Gas”ın mülkiyyətində olan qazpaylayıcı şəbəkə vasitəsilə həyata keçirilməlidir. Bu məqsədlə “SOCAR Georgia Gas” şirkəti qazpaylayıcı şəbəkənin (boru xətlərinin) icarəyə götürülməsini və əməkdaşlıq şərtlərinin təqdim olunmasını təklif edib. Şirkət tərəfindən ünvanlanan məktubda qeyd olunur ki, yüksək ictimai maraq nəzərə alınaraq, qanunvericiliyə uyğun şəkildə qaz təchizatının dərhal bərpası təmin ediləcək və bu prosesdə istifadə olunan infrastruktur üçün ədalətli kompensasiyanın ödənilməsi nəzərdə tutulur. Müraciətdə həmçinin vurğulanır ki, qarşı tərəfin təqdim edəcəyi şərtlər qüvvədə olan qanunvericiliyə uyğun olmalı və gələcək investisiya planlarının müəyyənləşdirilməsi baxımından mühüm əhəmiyyət kəsb edir. Qeyd edək ki, məktub “SOCAR Georgia Gas” şirkətinin direktoru Mariam Valişvili tərəfindən imzalanıb.

www.24news.ge

SOCAR-dan "Mamed Gas"a təklif məktubu göndərildi

Digər xəbərlər