Hərbi xidmətdən yayınmağa kömək vədi ilə dələduzluq edən şəxsə 26 epizod ittiham irəli sürülüb

Prokurorluq hərbi xidmətdən yayınmağa kömək edəcəyini vəd edərək çağırışçılardan dələduzluq yolu ilə pul alan və saxta rəsmi sənədlər hazırlayan şəxsə 26 epizod üzrə ittiham irəli sürüb. 24News.ge xəbər verir ki, bu barədə Gürcüstan Prokurorluğu məlumat yayıb. Məlumata görə, Müdafiə Nazirliyinin Baş Müfəttişliyi tərəfindən aparılan istintaq nəticəsində müəyyən edilib ki, təqsirləndirilən şəxs 2024–2026-cı illər ərzində çağırışçılara və onların ailə üzvlərinə məcburi hərbi xidmətdən yayınmağa kömək edəcəyini vəd edib və bunun müqabilində onları aldadaraq ümumilikdə 15 400 lari əldə edib. İstintaq həmçinin müəyyən edib ki, o, saxta tibbi tarixçələr hazırlamaq, xəstəlik simulyasiya etmək və "Psixi Sağlamlıq və Narkomaniyanın Qarşısının Alınması Mərkəzi" MMC-də hazırlanmış saxta sənədlərdən istifadə etməklə çağırışçıların hərbi xidmətinin təxirə salınmasına kömək edib. Bunun müqabilində onların ailə üzvlərindən ümumilikdə 26 900 lari alıb. Hüquq-mühafizə orqanları təqsirləndirilən şəxsi cari ilin aprel ayında saxlayıblar. Onun yaşayış evində aparılan axtarış zamanı 64 068 lari, 105 100 ABŞ dolları və narkotik vasitə olan marixuana aşkar edilərək götürülüb. İlkin mərhələdə saxlanılan şəxsə 6 epizod üzrə Cinayət Məcəlləsinin dələduzluğa dair maddəsi ilə ittiham irəli sürülmüş və barəsində həbs qətimkan tədbiri seçilmişdi. İstintaqın davamı zamanı daha 20 cinayət epizodu müəyyən edilib və ona qarşı ittiham ağırlaşdırılıb. O, dələduzluq, saxta rəsmi sənədlərin hazırlanması və istifadəsinə kömək, çağırışçının saxta sənədlər və xəstəliyin simulyasiyası yolu ilə hərbi xidmətdən yayınmasına yardım göstərmək, həmçinin narkotik vasitəni qanunsuz əldə etmə və saxlama maddələri ilə ittiham olunur. Qeyd olunan ittihamlar üzrə təqsirləndirilən şəxsi 7 ilədək azadlıqdan məhrumetmə cəzası gözləyir.

www.24news.ge

Hərbi xidmətdən yayınmağa kömək vədi ilə dələduzluq edən şəxsə 26 epizod ittiham irəli sürülüb

Digər xəbərlər