Kaladze: "Güclü yağışların yaratdığı problemlər təkcə Tbilisidə deyil, Avropanın bir çox şəhərində də yaşanır"

Çox qısa müddətdə normadan artıq yağıntının düşməsi nəticəsində yaranan problemlər təkcə Tbilisiyə xas deyil. Bu cür hallar Avropanın bir çox böyük şəhərlərində, o cümlədən Gürcüstandan daha güclü dövlətlərdə də müşahidə olunur. 24News.ge xəbər verir ki, bunu Tbilisi meri Kaxa Kaladze paytaxt hökumətinin bugünkü iclasında deyib. Kaladze paytaxtda yağan güclü yağışlardan danışaraq bildirib ki, meriya yol infrastrukturunun bərpası zamanı ilk növbədə yağış-kanalizasiya sistemlərini və yeraltı kommunikasiya xətlərini yeniləyir. Onun sözlərinə görə, ötən gün yağan güclü yağış paytaxtın bəzi rayon və küçələrində problemlər yaradıb. Gecə boyu təmizləmə işləri aparılıb və hazırda da küçələrin qaydaya salınması istiqamətində işlər davam etdirilir: "Təbii ki, çox qısa müddətdə qeyri-adi həcmdə yağıntı düşdükdə belə hallar yalnız Tbilisidə baş vermir. Biz bunu Avropanın bir çox iri şəhərlərində, iqtisadi cəhətdən daha güclü paytaxtlarda da görürük. Müasir infrastrukturun mövcud olmasına baxmayaraq, qısa müddətdə yağan intensiv yağışlar həmin infrastruktur üçün də problem yaradır", – deyə Kaladze bildirib. Tbilisi meri qeyd edib ki, bu, şəhərdə problemlərin olmadığı anlamına gəlmir və onların həlli istiqamətində işlər davam etdirilməlidir: "2017-ci ildən etibarən yol infrastrukturunun yenilənməsinə başladığımız bütün layihələrdə ilk növbədə yeraltı kommunikasiya xətləri və yağış sularının axıdılması sistemləri yenilənir. Əvvəlki illərdə yollar yalnız səthi şəkildə təmir olunurdu. Biz isə hər bir mühüm küçə və prospektin bərpasına yeraltı infrastrukturun tam yenilənməsi ilə başlayırıq", – deyə o vurğulayıb. Kaladzenin sözlərinə görə, uzun illər bu istiqamətdə demək olar ki, heç bir iş görülməyib və hazırda şəhər rəhbərliyi illər ərzində yığılıb qalmış problemləri aradan qaldırmağa çalışır: "Vəziyyət narahatedici deyil. Problemlər mərhələli şəkildə həll olunacaq və bütün infrastruktur qaydaya salınacaq. Təəssüf ki, bəzi insanlar hər güclü yağışı siyasi spekulyasiya vasitəsinə çevirirlər. Bizim məqsədimiz mübahisə etmək deyil, problemləri vaxtında həll etmək və gələcəkdə şəhəri daha dayanıqlı edəcək infrastruktur yaratmaqdır", – deyə Kaxa Kaladze əlavə edib.

www.24news.ge

Kaladze: "Güclü yağışların yaratdığı problemlər təkcə Tbilisidə deyil, Avropanın bir çox şəhərində də yaşanır"

Digər xəbərlər