Qızılhacılı kəndində təbii qazın dayandırılması və iddialarla bağlı SOCAR-dan rəsmi açıqlama

Marneuli bələdiyyəsinin Qızılhacılı kəndində və 26 May küçəsinin bir hissəsində təbii qazın kəsilməsi, eləcə də “Mamed Gas” şirkəti rəhbərliyinin irəli sürdüyü iddialarla bağlı SOCAR-ın Gürcüstan nümayəndəliyi açıqlama verib. 24News.ge xəbər portalına SOCAR şirkətindən verilən açıqlamada baş verən hadisələrə görə məsuliyyətin “Mamed Gas” MMC-nin üzərinə düşdüyü bildirilib. Məlumatda deyilir: “SOCAR Gas Export-Import” MMC 2020-ci ilin fevral ayından etibarən, müvafiq müqaviləyə əsasən, Marneuli Bələdiyyəsinin Qızılhacılı kənd sakinləri üçün “Mamed” MMC-yə qaz tədarük edir. “Mamed” MMC üçün sosial təyinatlı qaz təchizatı ciddi şəkildə səlahiyyətli orqan tərəfindən müəyyən edilmiş tarifə uyğun olaraq həyata keçirilir. Şirkətimizin sosial sektorda tarif müəyyən etmək səlahiyyəti yoxdur və bu, tamamilə müvafiq orqanın səlahiyyətindədir. Tarifin artırılması ilə bağlı bizə qarşı irəli sürülən bütün ittihamlar isə əsassızdır. 2020-ci ildən bu günə qədər “Mamed” MMC üçün sosial qazın qiyməti dörd dəfə dəyişib və hər dəfə şirkət yeni qiyməti öz istəyinə uyğun olaraq şərh edib. Bəzi hallarda şirkət dəyişən tarifi qəbul edirdi, bəzən isə kifayət qədər uzun vaxtlar, şirkət yeni tarifi özbaşına rədd etdir və bütün ödənişləri köhnə 2020-ci il tarifi əsasında həyata keçirirdi. Nəticə etibarilə isə, “Mamed” MMC-nin ödənilməmiş qaz üçün xeyli borcu yığılıb. Qeyd etmək istərdik ki, “Mamed” Şirkətinin bizə qarşı bütün ittihamları əsassızdır. Şirkətimizin fəaliyyəti həmişə qanuna və bütün məcburi dövlət qaydalarına və normativ aktlara ciddi şəkildə riayət etməyə əsaslanıb. Bir daha qeyd etmək istəyirik ki, SOCAR sosial qaz üçün tarif müəyyən etmir; biz səlahiyyətli orqan tərəfindən müəyyən və təsdiq edilmiş sosial təyinatlı qazın alqı-satqısı tarifinə ciddi şəkildə əməl edirik. Öz tərəfimizdən dəfələrlə ”Mamed” Şirkətini hüquqi çərçivəyə qayıtmağa və bazarın sosial seqmenti üçün müəyyən edilmiş qaydalara uyğun fəaliyyət göstərməyə dəvət etmişik, lakin bu, heç bir nəticə verməmişdir. Buna görə də, münasibətlərimiz tam həll olunana qədər kəskin tədbirlərə əl atmaq və “Mamed” Şirkətinə qaz təchizatını dayandırmaq məcburiyyətində qaldıq. Həmçinin hesab edirik ki, “Mamed” Şirkətinin üçüncü tərəflərlə davam edən məhkəmə prosesləri onu bizə qarşı olan öhdəliklərindən azad etmir. “Mamed” MMC ilə heç vaxt məhkəmələrdə heç bir hüquqi mübahisəmiz olmayıb və ümid edirik ki, bu vəziyyətdə də qarşılıqlı məqbul bir həll yolu tapa biləcəyik.

www.24news.ge

Qızılhacılı kəndində təbii qazın dayandırılması və iddialarla bağlı SOCAR-dan rəsmi açıqlama

Digər xəbərlər