კაზინოებს საერთაშორისო აზარტული თამაშების ტურნირების ორგანიზების შესაძლებლობა მიეცემათ

კაზინო დაწესებულებებს საერთაშორისო აზარტული თამაშების ტურნირების ორგანიზების შესაძლებლობა მიეცემათ — ნებართვას დაქვემდებარებული საქმიანობის სახეებს საერთაშორისო აზარტული თამაშების ტურნირების ორგანიზებაც დაემატება. 24News.ge-ის ინფორმაციით, ამასთან დაკავშირებით, „ქართული ოცნების“ დეპუტატების ინიციატივით, პარლამენტში წარდგენილია საკანონმდებლო პაკეტი, რომელიც საერთაშორისო აზარტული თამაშების ტურნირების ორგანიზების წესებსა და პირობებს განსაზღვრავს. დოკუმენტის თანახმად, საერთაშორისო აზარტული თამაშების ტურნირად მიიჩნევა კაზინოს მიერ ორგანიზებული ტურნირი, რომლის საპრიზო ფონდი წინასწარ არის გარანტირებული და რომლის მონაწილეთა სულ მცირე 70 პროცენტს უცხო ქვეყნის მოქალაქეები შეადგენენ. საერთაშორისო აზარტული თამაშების ტურნირის ორგანიზება შესაძლებელი იქნება როგორც კაზინოს საქმიანობისთვის ნებადართულ ობიექტში, ისე აღნიშნული ობიექტის გარეთ, შესაბამისი ნებართვის საფუძველზე. კანონპროექტის თანახმად, თუ საერთაშორისო აზარტული თამაშების ტურნირის საპრიზო ფონდი 3 მილიონ ლარს აღემატება და კლუბური მაგიდა მხოლოდ აღნიშნული ტურნირის ჩასატარებლად გამოიყენება, ორგანიზატორი კლუბურ მაგიდაზე დადგენილი სათამაშო ბიზნესის მოსაკრებლისგან გათავისუფლდება და ტურნირის ჩატარების შედეგად შემოსავლის მიღების უფლება ექნება. კანონპროექტის თანახმად, ნებართვის პირობების დარღვევისთვის 50 000 ლარის ოდენობის ჯარიმა დაწესდება. ხოლო უფლებამოსილების არმქონე პირის მიერ საერთაშორისო აზარტული თამაშების ტურნირის ორგანიზებისთვის 150 000 ლარის ოდენობის ჯარიმაა გათვალისწინებული. საერთაშორისო აზარტული თამაშების ტურნირის ორგანიზებისთვის წლიური სანებართვო მოსაკრებელი 100 000 ლარით განისაზღვრება. საკანონმდებლო პაკეტის ავტორები და ინიციატორები არიან პარტია „ქართული ოცნების“ დეპუტატები შოთა ბერეკაშვილი, თორნიკე ბერეკაშვილი, ირაკლი მეზურნიშვილი და გიორგი ბარვენაშვილი.

www.24news.ge

კაზინოებს საერთაშორისო აზარტული თამაშების ტურნირების ორგანიზების შესაძლებლობა მიეცემათ

სხვა სიახლეები