İrakli Qaribaşvili həbsxanadan növbəti qalmaqallı məktub yayıb

Gürcüstanın keçmiş Baş naziri İrakli Qaribaşvili həbsxanadan növbəti məktubunu yayıb. 24News.ge xəbər verir ki, Qaribaşvili məktubunda daha əvvəl yayımladığı yazı ilə bağlı açıqlama verib. O, həmin məktubun “Gürcü Arzusu” partiyasının icraçı katibi Mamuka Mdinaradze tərəfindən yaxın dostu vasitəsilə ailə üzvünə çatdırıldığını iddia edib. Keçmiş baş nazir Mdinaradzeni, günahsız insanların zərər görməsini istəmirsə, yalan məlumatlar yaymağa son qoymağa və baş verənlərə görə tam məsuliyyət daşımağa çağırıb. Qaribaşvili hakimiyyəti ona qarşı “çirkli təxribat” təşkil etməkdə və “namərdcəsinə tələ qurmaqda” ittiham edib. O bildirib ki, hakimiyyətə inanıb və “səmimi və kor-koranə etimadla” onların arxasınca gedib, lakin sonradan aldadıldığını və qurban verildiyini düşünür. Eks-premyer həmçinin 75 yaşlı atasının saxlanılması ilə bağlı ona artıq ikinci dəfə işarə edildiyini iddia edib. Qaribaşvili sosial şəbəkələrdə və televiziya kanallarında onun əleyhinə “təşkil olunmuş, ləyaqətsiz və böhtançı kampaniya” aparıldığını bildirib. O, özündən ölkəyə, komandaya və Bidzina İvanişviliyə xəyanət edən şəxs obrazı yaratmaq cəhdlərinin uğursuz olduğunu qeyd edib. “Fahişlərə sülh müqaviləsi bağlamaram” mənasını verən Vaja-Pşavelanın məşhur ifadəsinə istinad edən Qaribaşvili heç vaxt ölkəsinin əleyhinə çıxmadığını və bundan sonra da çıxmayacağını vurğulayıb. Keçmiş baş nazir hakimiyyətə müraciət edərək “dayanın və susun” çağırışı edib. Qaribaşvili məktubunda həmçinin bildirib ki, ona qarşı təzyiqlər həbsxanada da davam edir və ondan korrupsiya ittihamını qəbul etməsi tələb olunur. Onun sözlərinə görə, bu tələbin arxasında onun siyasətdən birdəfəlik uzaqlaşdırılması məqsədi dayanır. Eks-premyer özünü və ailəsini qoruduğunu, heç kimə qarşı mübarizə aparmadığını bildirib: “Artıq səkkiz aydır ki, həbsxanada səssiz otururam. İctimaiyyət qarşısında bir kəlmə belə danışmamışam. İndi isə deyirəm: mən heç kimlə mübarizə aparmıram, yalnız özümü və ailəmi müdafiə edirəm”, – deyə Qaribaşvili məktubunda yazıb.

www.24news.ge

İrakli Qaribaşvili həbsxanadan növbəti qalmaqallı məktub yayıb

Digər xəbərlər