Statusu dondurulmuş tələbələrə başqa universitetə keçid imkanı verilib

Ali təhsil islahatı çərçivəsində 2026-2027-ci tədris ili üçün dövlət tərəfindən təsis edilmiş ali təhsil müəssisələrində müəyyən təhsil proqramlarına tələbə qəbulunun məhdudlaşdırılması ilə əlaqədar statusu dondurulmuş tələbələrə mobillik, yəni başqa universitetə keçid hüququ verilib. 24News.ge xəbər verir ki, bu barədə Gürcüstanın Təhsilin İdarə Edilməsi üzrə İnformasiya Sistemi məlumat yayıb. Bildirilib ki, 2026-2027-ci tədris ili üçün dövlət universitetlərinin tələbə qəbul edə biləcəyi təhsil proqramları və tələbə sayı müəyyənləşdirilib. Qeyd olunub ki, tələbənin statusu qəbulun məhdudlaşdırıldığı təhsil proqramı üzrə dondurulubsa və universitet məhz bu səbəbdən onun statusunun bərpasından imtina edirsə, həmin tələbə 2026-2027-ci tədris ilində mobillik hüququndan istifadə edə bilər. Belə tələbələr təhsil müddətinin nə qədər olmasından asılı olmayaraq, təhsillərini başqa ali təhsil müəssisəsində davam etdirə biləcəklər. Mobillik hüququndan istifadə etmək üçün tələbə Təhsilin İdarə Edilməsi üzrə İnformasiya Sisteminə ərizə ilə müraciət etməlidir. Müraciət əsasında sistem tələbənin müəyyən edilmiş qayda və müddətlərə uyğun olaraq mobillik prosesində iştirakını təmin edəcək. 2026-2027-ci tədris ilinin payız semestri üzrə mobillik portalında qeydiyyat avqustun 24-də başlayacaq və sentyabrın 8-i saat 18:00-dək davam edəcək. Əlavə məlumat üçün Təhsilin İdarə Edilməsi üzrə İnformasiya Sisteminə (+995 32) 2 200 220 nömrəsi və ya info@emis.ge elektron poçt ünvanı vasitəsilə müraciət etmək mümkündür.

www.24news.ge

Statusu dondurulmuş tələbələrə başqa universitetə keçid imkanı verilib

Digər xəbərlər