Gürcüstanda “Yeni tanışlıqlar və xoş xatirələr” adlı yay düşərgəsi başa çatıb (FOTO)

Qurcaani rayonunun Qacreti qəsəbəsində “Parlaq Gələcək” Kitab Evinin təşkilatçılığı ilə keçirilən “Gürcüstanlı gənclərin yeni tanışlıqları və xoş xatirələr” adlı yay düşərgəsi başa çatıb. 24News.ge xəbər verir ki, tədbir iştirakçıları əvvəlcə Tbilisidəki Heydər Əliyev Parkında Ulu Öndərin büstü önünə əklil və gül dəstələri qoyaraq onun xatirəsini ehtiramla yad ediblər. Düşərgənin əsas məqsədi Gürcüstanda yaşayan azərbaycanlı və gürcü gənclərin bir araya gətirilməsi, milli-mədəni dəyərlərin tanıdılması, dünyagörüşünün genişləndirilməsi və yeni dostluq əlaqələrinin qurulması olub. Tədbirdə Diasporla İş üzrə Dövlət Komitəsinin məsul əməkdaşları Sabit Məmmədov və Elvin Əsgərov da iştirak ediblər. Çıxışlarda bu cür layihələrin gənclərin inkişafı, milli-mənəvi dəyərlərin qorunması və azərbaycanlı-gürcü gənclər arasında dostluq münasibətlərinin möhkəmləndirilməsində mühüm rol oynadığı vurğulanıb. Düşərgə çərçivəsində gənclər müxtəlif komanda oyunlarında, yaradıcılıq emalatxanalarında və sosial fəaliyyətlərdə iştirak edib, həmçinin mədəniyyət axşamlarında Azərbaycan və Gürcüstanın folklor nümunələrini, milli rəqslərini və adət-ənənələrini təqdim ediblər. İştirakçılar bu cür layihələrin qarşılıqlı anlaşma, inteqrasiya və dostluq münasibətlərinin inkişafına mühüm töhfə verdiyini bildiriblər. Bağlanış mərasimində fəallıq göstərən gənclərə sertifikatlar və xatirə hədiyyələri təqdim olunub. Düşərgə iştirakçıları tədbirdən yeni bilik və xoş təəssüratlarla yanaşı, yeni dostluq əlaqələri ilə ayrılıblar.

www.24news.ge

Gürcüstanda “Yeni tanışlıqlar və xoş xatirələr” adlı yay düşərgəsi başa çatıb (FOTO)

Digər xəbərlər