Sərxoş sürücülər artıq avtomobil sürə bilməyəcəklər - Alkoqol kilidi sisteminin tətbiqi planlaşdırılır

Gürcüstan hökuməti avtomobillərdə “Alcohol Interlock” – alkoqol kilidi cihazlarının tətbiqi imkanlarını nəzərdən keçirir. 24News.ge xəbər verir ki, bu təşəbbüs hökumətin təsdiqlədiyi 2026–2030-cu illər üzrə Yol Təhlükəsizliyi Milli Strategiyasında nəzərdə tutulub. Sənəddə qeyd olunur ki, “Alcohol Interlock” sistemi sürücünün orqanizmindəki alkoqolun səviyyəsi qanunvericiliklə müəyyən edilmiş həddi keçdiyi halda avtomobilin mühərrikinin işə salınmasına imkan vermir. Cihazın əsas məqsədi sərxoş vəziyyətdə avtomobil idarə edilməsinin qarşısını almaqdır. Strategiyaya əsasən, bu texnologiyanın tətbiqi ilə bağlı işlər davam etdiriləcək. Həmçinin cihazların Gürcüstan bazarında avtomobillərin satışa çıxarılması üçün müəyyən ediləcək standartlara daxil edilməsi planlaşdırılır. Sənəddə bildirilir ki, alkoqollu sərxoşluq Gürcüstanda yol-nəqliyyat hadisələrinin əsas səbəblərindən biri olaraq qalır. Rəsmi məlumatlara görə, 2025-ci ildə 2019-cu illə müqayisədə sərxoş vəziyyətdə nəqliyyat vasitəsinin idarə edilməsi halları 12,9% azalıb. Yol təhlükəsizliyi üzrə fəaliyyət planına əsasən, 2025-ci ilin ilk rübündə 109 yol-nəqliyyat hadisəsində sürücünün alkoqollu sərxoş vəziyyətdə olması ehtimal olunan səbəb kimi göstərilib. Bu hadisələr nəticəsində 15 nəfər ölüb, 129 nəfər yaralanıb. Bununla yanaşı, strategiyada sərxoş vəziyyətdə avtomobil idarə edilməsinin qarşısının alınması üçün digər tədbirlər də nəzərdə tutulur. Belə ki, ölkə üzrə narkotik vasitələrin aşkarlanması üçün xüsusi texniki vasitələrin mərhələli şəkildə tətbiqi və Daxili İşlər Nazirliyi əməkdaşlarının narkotik təsiri altında olan sürücüləri daha effektiv müəyyənləşdirməsi üçün onların təlim keçməsi planlaşdırılır. Strategiyada qeyd olunur ki, sərxoş vəziyyətdə avtomobil idarə edilməsinə qarşı mübarizədə aydın qaydalarla yanaşı, hüquq pozuntularının aşkarlanması və qanunvericiliyin effektiv icrasını özündə birləşdirən kompleks yanaşma daha səmərəlidir. Qeyd edək ki, 2026–2030-cu illər üzrə Yol Təhlükəsizliyi Milli Strategiyası və 2026–2027-ci illər üzrə Fəaliyyət Planı Gürcüstan hökuməti tərəfindən bir neçə gün əvvəl təsdiqlənib. Strategiyanın əsas məqsədi ölkə yollarında vəziyyətin yaxşılaşdırılması və beynəlxalq standartların tətbiqidir. Sənədə əsasən, 2030-cu ilədək yol-nəqliyyat hadisələri nəticəsində yaralanan və ölənlərin sayının 25% azaldılması hədəflənir. Strategiyanın icrasının aralıq və yekun qiymətləndirilməsi Gürcüstanın İqtisadiyyat və Davamlı İnkişaf Nazirliyinin koordinasiyası ilə həyata keçiriləcək. Aralıq hesabatın 2029-cu ildə, yekun hesabatın isə 2031-ci ildə hazırlanması nəzərdə tutulur. 2026–2027-ci illər üzrə Yol Təhlükəsizliyi Milli Strategiyasının Fəaliyyət Planının həyata keçirilməsinin təxmini dəyəri isə 98 milyon 923 min 578 lari təşkil edir.

www.24news.ge

Sərxoş sürücülər artıq avtomobil sürə bilməyəcəklər - Alkoqol kilidi sisteminin tətbiqi planlaşdırılır

Digər xəbərlər