Nərgiz Əliyeva: Bakı-Tbilisi-Bakı qatarına bilet satışı adı ilə vətəndaşlar aldadılır

Siyasi fəal Nərgiz Əliyeva sosial media hesabında Bakı-Tbilisi-Bakı sərnişin qatarına bilet satışı adı ilə sosial şəbəkələrdə fəaliyyət göstərən dələduzluq şəbəkələri barədə məlumat paylaşıb. 24News.ge xəbər verir ki, Nərgiz Əliyevanın sözlərinə görə, sosial şəbəkələrdə onlayn qaydada vətəndaşları qatar biletləri ilə təmin edəcəklərini vəd edən şəxslər müxtəlif hesablar, o cümlədən “Ajara Bet” kazino hesabları vasitəsilə ödəniş qəbul edirlər. O bildirib ki, vətəndaşlar ödənişi etdikdən sonra onlara heç bir bilet təqdim olunmur. Daha sonra isə həmin şəxslərlə əlaqə saxlamaq mümkün olmur və zənglərə cavab verilmir. Nərgiz Əliyeva özü də bu üsulla aldadıldığını və məsələ ilə bağlı polisə müraciət etdiyini bildirib. Siyasi fəal vətəndaşları sosial şəbəkələrdə qatar bileti satışı ilə bağlı yayılan elanlara qarşı diqqətli olmağa, biletlərin rəsmi satış kanallarından əldə edilməsinin mümkünlüyünü yoxlamağa çağırıb. Qeyd edək ki, son günlər vətəndaşlar Bakı-Tbilisi-Bakı sərnişin qatarına onlayn bilet əldə etməkdə çətinlik çəkdiklərini bildirirlər. Məlumata görə, biletlərin onlayn qaydada alınması mümkün olmadığı üçün sərnişinlər bilet əldə etmək məqsədilə Azərbaycandakı yaxınları vasitəsi ilə kassalara müraciət etməli olurlar. Bununla belə, kassalardan da biletlərin məhdud sayda olması səbəbindən çətinliklə əldə edildiyi bildirilir. Məhz bu vəziyyətdən istifadə edən bəzi şəxslərin sosial şəbəkələrdə qatar bileti satışı adı ilə vətəndaşları aldadaraq pul topladığı bildirilir. Məlumat üçün bildirək ki, “Azərbaycan Dəmir Yolları” Bakı–Tbilisi–Bakı beynəlxalq marşrutu üzrə yüksək tələbatı nəzərə alaraq bilet satış müddətini artırıb. Qeyd edilib ki, yeni tətbiq olunan mexanizmə əsasən, satış müddəti birdəfəlik deyil, mərhələli şəkildə artırılır. Hazırda sərnişinlər üçün 30 deyil, 44 günlük bilet satışı açıqdır. Qurumdan bildirilib ki, satış pəncərəsi növbəti günlərdə mərhələli şəkildə genişləndirilərək 90 günə çatdırılacaq.

www.24news.ge

Nərgiz Əliyeva: Bakı-Tbilisi-Bakı qatarına bilet satışı adı ilə vətəndaşlar aldadılır

Digər xəbərlər