Nəqliyyat vasitələrinin texniki baxışı üçün yeni tələblər planlaşdırılır

Aavtomobillərin dövri texniki baxış sisteminin daha da inkişaf etdirilməsi planlaşdırılır. 24News.ge xəbər verir ki, bu öhdəliyin tətbiqi və tənzimlənməsi məsələsi hökumətin avqustun 5-də qəbul etdiyi qərarla təsdiqlənən 2026–2030-cu illər üzrə Yol Təhlükəsizliyinin Milli Strategiyasında öz əksini tapıb. Sənədə əsasən, texniki baxış zamanı aşkarlanan çatışmazlıqların sistemli şəkildə müəyyənləşdirilməsi və aradan qaldırılmasına xüsusi diqqət yetiriləcək. Avtomobillərin texniki baxışı prosesinə əlavə komponentlərin də tətbiqi nəzərdə tutulur. Bunlar arasında avtomobillərdə E-Call sisteminin yoxlanılması və OBD sisteminin tətbiqi məsələləri də yer alır. Həmçinin avtomobillərin və onların qoşqularının yola yararlılığının dövri texniki yoxlanılmasını nəzərdə tutan Avropa İttifaqının 2014/45/EU direktivinin tam şəkildə tətbiqi planlaşdırılır. Strategiyada ayrıca istiqamət kimi şinlərin təhlükəsizliyi müəyyənləşdirilib. Dövlət texniki baxış zamanı şinlərin yaşı ilə bağlı tələblərin yenidən nəzərdən keçirilməsi və ikinci əl şinlərin bazara çıxarılması ilə bağlı mümkün risklərin müəyyənləşdirilməsi məqsədilə araşdırma aparmağı planlaşdırır. Strategiya, həmçinin motosikletlər və L kateqoriyasına aid digər nəqliyyat vasitələri də daxil olmaqla, ikitəkərli nəqliyyat vasitələrinin texniki baxış sistemində islahatların başlanması üçün zəruri tədbirlərin həyata keçirilməsini nəzərdə tutur. Bu qərarın əsas səbəblərindən biri son illərdə ikitəkərli nəqliyyat vasitələrinin iştirakı ilə baş verən yol-nəqliyyat hadisələrinin sayının artmasıdır. Texniki tələblərin sərtləşdirilməsi ilə yanaşı, ictimai maarifləndirmə kampaniyalarının da keçirilməsi planlaşdırılır. Məqsəd cəmiyyətin texniki cəhətdən saz və təhlükəsiz avtomobillərdən istifadənin əhəmiyyəti barədə məlumatlılığını artırmaqdır. Strategiyanın layihəsi Gürcüstanın İqtisadiyyat və Davamlı İnkişaf Nazirliyi tərəfindən yol təhlükəsizliyinə cavabdeh dövlət qurumları ilə əməkdaşlıq çərçivəsində hazırlanıb.

www.24news.ge

Nəqliyyat vasitələrinin texniki baxışı üçün yeni tələblər planlaşdırılır

Digər xəbərlər