Papuaşvili Gürcüstanın regionda Rusiya və İranın müttəfiqi kimi təqdim olunmasını narahatedici tendensiya adlandırıb

Parlamentin sədri Şalva Papuaşvili bəyan edib ki, Gürcüstan müstəqil və suveren dövlətdir və ölkənin gələcəyini müəyyən etmək hüququ yalnız gürcü xalqına məxsusdur. 24News.ge xəbər verir ki, bu barədə Parlament sədri keçirdiyi birifnq zamanı qeyd edib. Papuaşvili bildirib ki, son dövrlər radikal müxalif qüvvələrin milli əhəmiyyətli məsələlərlə bağlı bəyanatları artıb və bu çıxışlar ölkənin suverenliyinə zərbə vurmağa xidmət edir. Onun sözlərinə görə, radikal müxalifət nümayəndələri – Gigi Tsereteli, Giga Bokeria və Zurab Caparidze ABŞ-ın regiona artan marağından danışaraq ictimaiyyəti Gürcüstanın öz milli maraqlarını deyil, başqa dövlətlərin maraqlarını müdafiə etməli olduğuna inandırmağa çalışırlar. “Gürcüstanın inkişaf yolu, hakimiyyət seçimi və strateji qərarları yalnız demokratik proseslər nəticəsində formalaşır. Bu fundamental prinsipdir və onu nə siyasi manipulyasiya, nə də xarici təzyiq əvəz edə bilər”, – deyə Papuaşvili vurğulayıb. Parlament sədri bildirib ki, son illər daxili siyasi rəqabət demokratik mübarizə çərçivəsini aşaraq Gürcüstanın beynəlxalq imicinə və dövlət maraqlarına qarşı yönəlmiş kampaniyaya çevrilmək təhlükəsi yaradır. Papuaşvili xüsusilə Gürcüstanın regionda Rusiya və İranın müttəfiqi və ya dayağı kimi təqdim olunmasını narahatedici tendensiya adlandırıb: “Rusiyanın Gürcüstan ərazilərinin 20 faizini işğal etdiyi və iki ölkə arasında diplomatik münasibətlərin kəsildiyi şəraitdə belə iddiaların reallıqla heç bir əlaqəsi yoxdur. İranla münasibətlərə gəlincə, bu əlaqələr nə siyasi, nə də iqtisadi baxımdan regionun digər dövlətlərinin İranla münasibətləri səviyyəsinə yaxın deyil”, – deyə o qeyd edib. Parlament sədri həmçinin Gürcüstanla Çin arasında inkişaf edən strateji əməkdaşlığın gözdən salınmasına yönəlmiş cəhdləri də tənqid edib. Onun sözlərinə görə, hər bir beynəlxalq tərəfdaşlıq yalnız bir meyarla qiymətləndirilməlidir – onun Gürcüstanın milli maraqlarına nə dərəcədə xidmət etməsi ilə. Papuaşvili vurğulayıb ki, yerli siyasi qrupların xarici qüvvələrin maraqlarının daşıyıcısı kimi çıxış etməsi yolverilməzdir və dövlətlərarası sağlam tərəfdaşlıq bir ölkənin digərinin maraqlarına xidmət etməsinə deyil, milli maraqların uzlaşdırılmasına əsaslanmalıdır. O, ictimaiyyəti Gürcüstanın milli maraqlarına zidd mövqelər formalaşdırmağa yönəlmiş məlumatları tənqidi şəkildə qiymətləndirməyə çağırıb və qeyd edib ki, tarix göstərir: daxili siyasi qarşıdurmalar dövlət maraqlarından üstün tutulduqda ölkələr ən ağır nəticələrlə üzləşirlər.

www.24news.ge

Papuaşvili Gürcüstanın regionda Rusiya və İranın müttəfiqi kimi təqdim olunmasını narahatedici tendensiya adlandırıb

Digər xəbərlər