Kobaxidze: “Avropa bürokratiyası sovet yanaşmasından imtina etməli və bizimlə dialoqa girməlidir”

Baş nazir İrakli Kobaxidze Avropa İttifaqı strukturlarına və Avropa bürokratiyasına müraciət edərək onları birbaşa dialoqa dəvət edib. 24News.ge xəbər verir ki, o, Avropa tərəfini tənqid edərək bildirib ki, sovet dövründən qalma yanaşmalardan imtina olunmalı və açıq ünsiyyətə keçilməlidir. Baş nazirin sözlərinə görə, hazırda Avropa qurumları ilə sıfır səviyyədə ünsiyyət var və yalnız teleqramlar vasitəsilə münasibət qurulur: “Necə ki, vaxtilə Sovet Moskvadan Gürcüstana teleqramlar göndərilirdi, indi də eyni üsulla bizə mesajlar çatdırılır. Biz isə açıq danışığa hazırıq – istər ictimaiyyət qarşısında, istər qapalı şəkildə. Bizə sübut edilsəydi ki, hansısa qanunda problem var, biz onu geri götürməyə də hazır idik. Amma dialoq əvəzinə bizə qarşı yalnız ittihamlar səslənir.” Kobaxidze xüsusilə Gürcüstanda qəbul olunmuş şəffaflıq qanununun “rus qanunu” kimi təqdim edilməsini tənqid edərək, Avropa bürokratiyasının arqumentsiz və siyasi motivli yanaşmalar nümayiş etdirdiyini bildirib: “Bizim insan hüquqları anlayışımız Avropa bürokratiyasının diktəsi ilə uyğun gəlməyə bilər. Onlar bizə deyirlər ki, cins haqqında qeyd dəyişdirilməli, eyni cinsli cütlüklər azyaşlıları övladlığa götürə bilməlidir. Biz isə hesab edirik ki, bu, Gürcüstan cəmiyyətinin dəyərlərinə ziddir. Əgər bu səbəblərdən vizaliberallaşmanı ləğv edəcəklərsə, bu, fəlakət olar”, – deyə baş nazir vurğulayıb. O, həmçinin qeyd edib ki, Avropa bürokratiyasının 2023 və 2024-cü illərdə Gürcüstanda baş verən zorakılıqlarla bağlı danışmağa mənəvi haqqı yoxdur, çünki həmin hadisələrə Avropa strukturlarının və Qərb səfirlərinin birbaşa və ya dolayı təsiri olub: “Keçmiş ABŞ səfiri və Avropa nümayəndələri bu etirazları təşviq edirdilər. Belə olan halda, bizim hüquq-mühafizə orqanlarının hərəkətlərini tənqid etməyə mənəvi haqları yoxdur. Tənqid varsa, bunu yalnız Gürcüstan vətəndaşları edə bilər”, – deyə Kobaxidze bildirib. Sonda baş nazir əlavə edib ki, Gürcüstan hökuməti dialoqa açıqdır və Avropa tərəfi sovet dövründən qalma münasibət tərzini dəyişməli, qarşılıqlı hörmətə əsaslanan ünsiyyət qurmalıdır.

www.24news.ge

Kobaxidze: “Avropa bürokratiyası sovet yanaşmasından imtina etməli və bizimlə dialoqa girməlidir”

Digər xəbərlər