Anakliya limanının tikintisi üçün 6 vətəndaşın əmlakı məcburi qaydada müsadirə ediləcək

Anakliya dərin dəniz limanının tikintisinin fasiləsiz həyata keçirilməsi məqsədilə Zuqdidi bələdiyyəsinin üç kəndində bir neçə vətəndaşa məxsus torpaq sahələri məcburi qaydada müsadirə ediləcək. 24News.ge xəbər verir ki, ümumilikdə 12 222 kvadratmetr torpaq sahəsinin ekspropriasiyaya məruz qalması nəzərdə tutulur. Gürcüstanın İqtisadiyyat və Davamlı İnkişaf nazirinin avqustun 20-də imzaladığı və qanunvericilik xəbərçisində dərc olunan əmrə əsasən, Avtomobil Yolları Departamentinə sözügedən əmlakların ekspropriasiyası hüququ verilib. Sənəddə qeyd olunur ki, Anakliya dəniz limanı Qara dənizin şərq hissəsində, Zuqdidi bələdiyyəsinin Anakliya kəndində, İnquri çayının cənubunda, Tikori çayının mənsəbində yerləşir və təxminən 2,5 kilometrlik sahil xəttini əhatə edir. Limanın konteyner, quru və maye yüklərə xidmət göstərməsi nəzərdə tutulur. Limanın tikintisinə hazırlıq işlərinə 2017-ci ilin sonlarından başlanılıb. Layihə çərçivəsində Anakliya limanını ölkənin şərq hissəsi ilə birləşdirəcək avtomobil yolu və dəmir yolu infrastrukturunun tikintisi də planlaşdırılır. İki zolaqlı avtomobil yolu və birxətli dəmir yolu eyni dəhliz boyunca salınacaq. Sənəddə bildirilir ki, layihə dərin dəniz limanına çıxışın təmin edilməsi baxımından ictimai zərurət daşıyan layihə hesab olunur. Məlumata görə, Departament bir sıra vətəndaşlarla danışıqlar aparsa da, razılıq əldə etmək mümkün olmayıb. Bu səbəbdən tələb olunan torpaq sahələri üzrə ekspropriasiya hüququ verilib. Ekspropriasiyaya məruz qalacaq əmlaklar: Zuqdidi bələdiyyəsinin Dardçeli kəndində Beka Qvilava, Raul Qvilava və Sopio Çitanavaya məxsus kənd təsərrüfatı təyinatlı 605 kvadratmetr torpaq sahəsi; Zuqdidi bələdiyyəsinin Anakliya kəndində Nona Qorşiyaya məxsus kənd təsərrüfatı (əkin) təyinatlı 1 546 kvadratmetr torpaq sahəsi; Zuqdidi bələdiyyəsinin Dardçeli kəndində Zviad Xarçilavaya məxsus 64 kvadratmetr torpaq sahəsi; Zuqdidi bələdiyyəsinin Kirov kəndində İnqa Absanzeyə məxsus kənd təsərrüfatı (həyətyanı) təyinatlı 10 007 kvadratmetr torpaq sahəsi. Nazirin əmrində qeyd olunur ki, qərardan onun dərc edildiyi və ya rəsmi qaydada təqdim edildiyi gündən etibarən bir ay müddətində Tbilisi Şəhər Məhkəməsinin İnzibati İşlər Kollegiyasına şikayət verilə bilər.

www.24news.ge

Anakliya limanının tikintisi üçün 6 vətəndaşın əmlakı məcburi qaydada müsadirə ediləcək

Digər xəbərlər