Avropa Komissiyası Gürcüstan hakimiyyətinə məhkəmə islahatları ilə bağlı tövsiyələr ünvanlayıb

"Gürcüstanda məhkəmə sistemi və fundamental hüquqlar sahəsində ardıcıl üçüncü ildir geriləmə qeydə alınır". 24News.ge xəbər verir ki, bu barədə Avropa Komissiyasının dərc etdiyi 2026-cı il üzrə genişlənmə paketində bildirilir. Hesabatda qeyd olunur ki, Gürcüstanda məhkəmə sisteminin müstəqilliyi, qərəzsizliyi və bütövlüyü ciddi şəkildə sarsılıb. Avropa Komissiyasının qiymətləndirməsinə görə, hesabat dövründə geriləmə müşahidə olunub və məhkəmə sistemində əsaslı və hərtərəfli islahatların aparılması ilə bağlı Avropa Komissiyası və Venesiya Komissiyasının tövsiyələrinin yerinə yetirilməsi istiqamətində heç bir islahat həyata keçirilməyib. Sənəddə xüsusilə Gürcüstanın Ali Ədliyyə Şurası və Ali Məhkəmədə müvafiq tövsiyələr nəzərə alınmaqla hərtərəfli islahat aparmadığı vurğulanır. Hesabatda bildirilir ki, 2025-ci ilin dekabrında məhkəmə sisteminin hüquqi çərçivəsinə edilən dəyişikliklər onun müstəqilliyinə daha da zərər vurur və məhkəmə sisteminin ələ keçirilməsi riskini artırır. Etirazçılara qarşı çıxarılan sərt və qeyri-mütənasib hökmlər isə məhkəmələrin repressiv sistemin həyata keçirilməsində alət kimi istifadə olunduğuna dair şübhələr yaradır. Avropa Komissiyası ötən il irəli sürülən tövsiyələrin yerinə yetirilmədiyini və onların hələ də qüvvədə qaldığını bildirir. Hesabatda Gürcüstana bir sıra tövsiyələr ünvanlanıb. Belə ki, ölkə “Ümumi məhkəmələr haqqında” qanunu Ali Ədliyyə Şurasının səlahiyyətləri ilə bağlı Venesiya Komissiyasının tövsiyələrinə uyğunlaşdırmalıdır. Bundan əlavə, məhkəmə sistemində daha genişmiqyaslı islahatlar, xüsusilə Ali Ədliyyə Şurasında Venesiya Komissiyasının tövsiyələrinə uyğun dəyişikliklər həyata keçirilməlidir. Avropa Komissiyası, həmçinin “Baş Prokurorluq haqqında” qanunun Venesiya Komissiyası, İqtisadi Əməkdaşlıq və İnkişaf Təşkilatı (OECD), eləcə də Avropa İttifaqının maliyyələşdirdiyi Texniki Yardım və İnformasiya Mübadiləsi Alətinin (TAIEX) tövsiyələri əsasında Avropa standartlarına uyğunlaşdırılmasını tövsiyə edir.

www.24news.ge

Avropa Komissiyası Gürcüstan hakimiyyətinə məhkəmə islahatları ilə bağlı tövsiyələr ünvanlayıb

Digər xəbərlər