Samadaşvili: "Bu hakimiyyət ölkəni idarə etdiyi müddətdə Azərbaycanla sərhəd məsələsində irəliləyiş gözləmirəm"

“Lelo – Güclü Gürcüstan” partiyasının liderlərindən biri Salome Samadaşvili Gürcüstan və Azərbaycan arasında dövlət sərhədinin delimitasiya-demarkasiyası məsələsində mövcud hakimiyyət dövründə irəliləyiş əldə olunacağına inanmadığını bildirib. 24News.ge xəbər verir ki, Samadaşvili bu barədə Baş nazir İrakli Kobaxidzenin Davit Qareci kompleksi və Gürcüstan-Azərbaycan sərhədi ilə bağlı açıqlamasını şərh edərkən danışıb. Onun sözlərinə görə, Gürcüstan-Azərbaycan sərhədinin delimitasiya və demarkasiyası mürəkkəb məsələdir və yekun razılaşmanın əldə olunması üçün tərəflərdən ciddi kompromislər tələb olunur. Samadaşvili bildirib ki, 2020-ci ildə Bidzina İvanişvilinin hakimiyyəti tərəfindən Davit Qareci məsələsi ətrafında aparılan təbliğat kampaniyası Azərbaycanla danışıqlar prosesinə əlavə maneələr yaradıb: “Bu hakimiyyət ölkəmizi idarə etdiyi müddətdə heç bir irəliləyiş gözləmirəm. Xüsusilə də nəzərə alsaq ki, Azərbaycan bu gün regionumuzda lider dövlətə çevrilib, Gürcüstanın hazırkı hakimiyyəti isə bütün strateji tərəfdaşlarından təcrid olunub və artıq heç bir məsələdə, heç bir yerdə öz mövqeyini müdafiə edə bilmir”, – deyə Samadaşvili bildirib. O, həmçinin 2020-ci ildə Davit Qareci məsələsi ilə bağlı aparılan kampaniya çərçivəsində günahsız alimlərin həbs edildiyini xatırladaraq, bunun Azərbaycanla münasibətlərdə konstruktiv danışıqlara mane olduğunu vurğulayıb. Qeyd edək ki, Baş nazir İrakli Kobaxidze daha əvvəl Azərbaycan tərəfi ilə dövlət sərhədinin delimitasiya-demarkasiyası prosesinin sürətləndirilməsi barədə razılıq əldə olunduğunu açıqlamışdı. Baş nazirin sözlərinə görə, razılaşdırılmamış 15 sərhəd sahəsi üzrə işlərin fəallaşdırılması və hər bir sahənin ayrıca müzakirəsi nəzərdə tutulur.

www.24news.ge

Samadaşvili: "Bu hakimiyyət ölkəni idarə etdiyi müddətdə Azərbaycanla sərhəd məsələsində irəliləyiş gözləmirəm"

Digər xəbərlər