Rəsmi açıqlama: "Dekabr ayında qaz və su tariflərinə yenidən baxılacaq"

Gürcüstanda cari ilin sonunda təbii qaz və su təchizatı tariflərinə yenidən baxılması planlaşdırılır. Elektrik enerjisinin tarifində isə ilin sonunadək dəyişiklik nəzərdə tutulmur. 24News.ge xəbər verir ki, bu barədə Gürcüstanın Enerji və Su Təchizatı Tənzimləmə Milli Komissiyasının sədri David Narmania müsahibəsində bildirib. Onun sözlərinə görə, elektrik enerjisinin yeni tarifləri bir neçə ay əvvəl müəyyən edilib və orta müddətli dövr ərzində qüvvədə olacaq. Təbii qaz və su təchizatı tariflərinin qüvvədə olma müddəti isə dekabrın sonunda başa çatdığı üçün həmin tariflərə yenidən baxılması planlaşdırılır. “Bu ilin sonunda elektrik enerjisi tariflərinə yenidən baxılmasına ehtiyac yoxdur. Yeni tarifləri bir neçə ay əvvəl müəyyən etmişik və onlar orta müddətli dövrdə qüvvədə olacaq. Cari ilin sonunda isə təbii qaz və su təchizatı tariflərinə yenidən baxmağı planlaşdırırıq, çünki onların qüvvədə olma müddəti məhz dekabrın sonunda başa çatır”, – deyə Narmania bildirib. Qeyd edək ki, Gürcüstanda elektrik enerjisinin tarifi bu ilin aprel ayından etibarən orta hesabla 5 tetri artırılıb. Hazırda Tbilisidə əhali üçün təbii qazın bir kubmetrinin tarifi 53,971 tetri təşkil edir. Bu tarif ilkin olaraq 2021-ci ilin mayında müəyyən edilib və həmin il iyunun 1-dən qüvvəyə minib. Sonradan tarifin qüvvədə olma müddəti 2023–2025-ci illəri, daha sonra isə 2026–2027-ci illəri əhatə edən tənzimləmə dövrləri üçün dəyişiklik edilmədən uzadılıb. Su təchizatına gəlincə, sayğacı olan abonentlər hər istifadə edilən 1 kubmetr su üçün 0,50 lari ödəyirlər. Sayğacı olmayan abonentlər üçün isə aylıq ödəniş yaşayış evində qeydiyyatda olan hər bir şəxsə görə 4,517 lari təşkil edir. Yeni tariflərin müəyyənləşdirilməsi ilə bağlı yekun qərarın hansı istiqamətdə olacağı hələ məlum deyil.

www.24news.ge

Rəsmi açıqlama: "Dekabr ayında qaz və su tariflərinə yenidən baxılacaq"

Digər xəbərlər