Prezident: "Əsrlər boyu Gürcüstan Şərqlə Qərb arasında mədəni və dini müxtəlifliyin, fərqli icmaların unikal məkanı olub"

Gürcüstan Prezidenti Mixeil Kavelaşvili “Tanrı, Vətən, İnsan” adlı beynəlxalq simpoziumun açılış mərasimində çıxış edərək xristianlığın dövlət dini elan edilməsinin 1700 illiyinin ölkə üçün tarixi əhəmiyyətini vurğulayıb. 24News.ge xəbər verir ki, Prezident bildirib ki, bu il bütün Gürcüstan xristianlığın dövlət dini elan edilməsinin 1700 illiyini təntənəli şəkildə qeyd edir. Onun sözlərinə görə, 17 əsr əvvəl gürcü xalqının verdiyi mühüm mənəvi qərar xalqın mədəni simasını, dövlətçilik düşüncəsini və tarixi yolunu əbədi müəyyənləşdirib. Kavelaşvilinin sözlərinə görə, əsrlər boyu Gürcüstan Şərqlə Qərb arasında həm coğrafi və sivilizasiya körpüsü, həm də mədəni və dini müxtəlifliyin, fərqli icmaların dinc yanaşı yaşamasının unikal məkanı olub. Prezident qeyd edib ki, Gürcüstanın tarixi işğalçılara qarşı mübarizə və azadlıq uğrunda mübarizənin salnaməsidir. O bildirib ki, ölkənin ən çətin dövrlərində Gürcüstan Pravoslav Kilsəsi xalqı birləşdirib, vətəni, ana dilini, milli şüuru və tarixi yaddaşı qoruyub. “Xristianlıq bizim üçün mənəvi güc və intellektual dayaq olub. O, ən ağır sınaqlar zamanı milli kimliyimizi qoruyub saxlamağa kömək edib və bizə öyrədib ki, insan ləyaqəti, vətən sevgisi, azadlıq və məsuliyyət bir-birindən ayrılmaz dəyərlərdir”, – deyə Kavelaşvili bildirib. Prezident vurğulayıb ki, müasir dünya dəyərlər böhranı və geosiyasi sarsıntılarla üzləşdiyi bir vaxtda Gürcüstan dövləti, cəmiyyəti və insanın özü hansı təməllər üzərində dayanmalıdır sualı xüsusi əhəmiyyət daşıyır. Kavelaşvilinin sözlərinə görə, Gürcüstanın dövlətçilik düşüncəsində bu gün yeddi əbədi dəyər bir araya gəlir: Tanrı, Vətən, İnsan, torpaq, dil, inanc və ailə. O bildirib ki, yeddi komponentdən ibarət bu formul XIX əsrdə Müqəddəs İlia Çavçavadzenin irəli sürdüyü milli üçlüyə və Gürcüstanın mərhum patriarxı II İliyanın mənəvi irsinə əsaslanır. Prezidentin sözlərinə görə, bu dəyərlər Şota Rustaveli və Vaja-Pşavelanın zəngin irsi də daxil olmaqla, gürcü milli düşüncəsinin çoxəsrlik ənənələrini özündə birləşdirir. Kavelaşvili əlavə edib ki, qloballaşma və süni intellekt dövründə insan kimliyinin dəyərdən düşməsi təhlükəsi qarşısında bu əbədi dəyərlər cəmiyyət üçün mühüm mənəvi müdafiə rolunu oynayır. Onun fikrincə, bu ideallarla yetişən gürcü gəncləri daha təhlükəsiz, inkişaf etmiş, mənəvi cəhətdən möhkəm və empatiyalı cəmiyyətin təminatıdır. Prezident çıxışında bildirib ki, 1700 il əvvəl əcdadların verdiyi qərar gürcü xalqının əbədi mövcudluğunu müəyyənləşdirib. O vurğulayıb ki, müasir Gürcüstan dövləti və onun strateji inkişafı məhz bu yeddi əbədi dəyər üzərində qurulmalıdır. “Çoxəsrlik mənəvi xəzinəmizi və milli kimliyimizi zədələmədən gələcək nəsillərə ötürmək hamımızın ümumi borcudur. Çünki əsrlərin sınaqlarında möhkəmlənmiş bu irs güclü, vahid və suveren Gürcüstanın əsas təminatıdır. Tanrı Gürcüstanı qorusun”, – deyə Mixeil Kavelaşvili çıxışını yekunlaşdırıb.

www.24news.ge

Prezident: "Əsrlər boyu Gürcüstan Şərqlə Qərb arasında mədəni və dini müxtəlifliyin, fərqli icmaların unikal məkanı olub"

Digər xəbərlər