Milli Qida Agentliyi bağçalarda uşaqların zəhərlənməsi ilə bağlı araşdırmaya başlayıb

Tbilisidə uşaq bağçalarında uşaqlar və bir tərbiyəçinin zəhərlənməsi ilə bağlı Milli Qida Agentliyi araşdırmaya başlayıb. 24News.ge xəbər verir ki, agentliyin məlumatına görə, hadisə barədə məlumat daxil olduqdan dərhal sonra müfəttişlər uşaq bağçalarından və onları qida məhsulları ilə təmin edən şirkətlərdən ərzaq nümunələri götürərək laborator müayinəyə göndəriblər. Laboratoriya nəticələri əldə olunan kimi ictimaiyyətə açıqlanacaq. Milli Qida Agentliyi bildirir ki, yeni tədris ilinin başlamasından əvvəl uşaq bağçalarında monitorinq aparılıb və infrastrukturun qanunvericiliyin tələblərinə uyğunluğu qiymətləndirilib. Hazırda isə bağçaların qida bloklarında ərzağın qəbulundan, saxlanılması və emalından hazır məhsulun təqdim edilməsinə qədər bütün istehsal zəncirinə nəzarət davam etdirilir. Qeyd edək ki, Maliyyə Nazirliyinin İstintaq Xidməti də bağçalarda baş verən ehtimal olunan intoksikasiya ilə bağlı araşdırmaya başlayıb. İstintaq Xidmətinin məlumatına görə, Tbilisidə yerləşən 20 uşaq bağçasında 55 uşaq və bir tərbiyəçidə intoksikasiya əlamətləri müşahidə olunub. Onlara 6 tibb müəssisəsində tibbi yardım göstərilib. İstintaq çərçivəsində 50-dən çox uşağın qanuni nümayəndəsi və tibb müəssisələrinin əməkdaşları dindirilib. Həmçinin hadisənin səbəblərinin müəyyənləşdirilməsi üçün bağçalardan və qida təchizatçılarından nümunələr götürülüb. İlkin məlumata görə, intoksikasiya bakterial infeksiya ilə əlaqəli ola bilər və ehtimal olunan mənbə bağçalarda istifadə olunan qida məhsullarıdır. Lakin konkret hansı məhsulun səbəb olduğu laborator və ekspertiza nəticələrindən sonra müəyyənləşdiriləcək. Araşdırma davam edir.

www.24news.ge

Milli Qida Agentliyi bağçalarda uşaqların zəhərlənməsi ilə bağlı araşdırmaya başlayıb

Digər xəbərlər