20 bağçada 55 uşaqda zəhərlənmə əlamətləri aşkarlanıb, bir neçə bağça bağlanıb

Tbilisidə 20 uşaq bağçasında 55 uşaq və bir tərbiyəçidə intoksikasiya əlamətləri aşkarlanıb. 24News.ge xəbər verir ki, Maliyyə Nazirliyinin İstintaq Xidmətinin məlumatına görə, hadisə ilə bağlı məlumat daxil olduqdan dərhal sonra araşdırmaya başlanılıb. İstintaq Cinayət Məcəlləsinin 198-ci maddəsinin ikinci hissəsi ilə, insan həyatı və sağlamlığı üçün təhlükəli məhsulun hazırlanması və satışına dair aparılır. Məlumata görə, intoksikasiya əlamətləri olan şəxslər tibbi yardım üçün Tbilisidə yerləşən 6 tibb müəssisəsinə müraciət ediblər. İstintaq çərçivəsində 50-dən çox uşağın qanuni nümayəndəsi və tibb müəssisələrinin əməkdaşları dindirilib. Hadisənin səbəblərinin müəyyənləşdirilməsi məqsədilə gecə saatlarında 4 uşaq bağçasında və bağçaları qida məhsulları ilə təmin edən 3 şirkətdə axtarışlar aparılıb. Əməliyyatlar Daxili İşlər Nazirliyinin müvafiq bölmələri və Milli Qida Agentliyi ilə əməkdaşlıq çərçivəsində həyata keçirilib. İstintaq Xidmətinin ilkin məlumatına görə, intoksikasiya bakterial infeksiya ilə əlaqəli ola bilər və mənbənin bağçalarda istifadə olunan qida məhsulları olduğu ehtimal edilir. Lakin konkret hansı məhsulun səbəb olduğu ekspertizanın nəticəsindən sonra müəyyənləşdiriləcək. Bundan əlavə, epidemioloji risklərin qarşısının alınması məqsədilə Tbilisidə 7 dövlət uşaq bağçasında təlim-tərbiyə prosesi dayandırılıb. Digər 183 bağçanın fəaliyyətini davam etdirdiyi bildirilib. Araşdırma davam edir. İntoksikasiya halları qeydə alınan bağçalardan iş üçün əhəmiyyətli əşyalar, sənədlər və qida məhsullarının götürülməsi planlaşdırılır.

www.24news.ge

20 bağçada 55 uşaqda zəhərlənmə əlamətləri aşkarlanıb, bir neçə bağça bağlanıb

Digər xəbərlər