Algeti Milli Parkındakı maral təsərrüfatına 6 yeni maral gətirilib (FOTO)

Algeti Milli Parkında yaradılmış Qafqaz nəcib maralının yetişdirilməsi təsərrüfatına 3 erkək və 3 dişi maral əlavə edilib. Bununla da təsərrüfatda maralların sayı 15-ə çatıb. 24News.ge xəbər verir ki, bu barədə məlumatı Gürcüstanın Milli Vəhşi Təbiət Agentliyi yayıb. Agentliyin məlumatına görə, yeni gətirilən maralların yaşı bir ildən azdır və onların bu il ilk cütləşmə dövrünə daxil olması gözlənilir. Bu isə populyasiyanın artırılması və yenilənməsi imkanlarını genişləndirə bilər. Qafqaz nəcib maralının yetişdirilməsi təsərrüfatı 72 hektar ərazidə yerləşir və tamamilə hasarlanıb. Ərazi foto-tələlər və kameralar daxil olmaqla müasir monitorinq sistemləri ilə təchiz edilib. Təsərrüfatda maralların çoxalması və ətraf mühitə uyğunlaşması üçün müvafiq şərait yaradılıb. Milli Vəhşi Təbiət Agentliyinin məlumatına əsasən, təsərrüfatda marallar bir il ərzində daim müşahidə altında saxlanılıb. Bu müddətdə mütəxəssislər onların davranışını, sosial dinamikasını və ətraf mühitə uyğunlaşma prosesini öyrəniblər. Layihə Gürcüstanın Ətraf Mühitin Mühafizəsi və Kənd Təsərrüfatı Nazirliyi tərəfindən təsdiqlənmiş növlərin bərpası proqramı çərçivəsində, Milli Vəhşi Təbiət Agentliyinin təşəbbüsü ilə həyata keçirilir. Algeti Milli Parkı Qafqaz nəcib maralının bərpası üçün təbii yaşayış mühiti və yüksək mühafizə səviyyəsinə görə seçilib. Tbilisi Zooparkının direktoru Zurab Qurielidzenin sözlərinə görə, maralların reintroduksiyası üzərində iş bir neçə il əvvəl başlayıb və təsərrüfata yeni fərdlərin əlavə edilməsi hər il davam etdiriləcək.

www.24news.ge

Algeti Milli Parkındakı maral təsərrüfatına 6 yeni maral gətirilib (FOTO)

Digər xəbərlər