Gürcüstanda azərbaycandilli məktəblərdə ana dili dərslərinin azaldılması narahatlıq doğurur (VİDEO)

Son illərdə Gürcüstanda milli tədris planına edilən dəyişikliklər azərbaycandilli məktəblərdə Azərbaycan dili və ədəbiyyatı fənlərinin tədris saatlarının azalmasına səbəb olub. 24News.ge xəbər verir ki, müəllimlərin sözlərinə görə, əvvəllər Azərbaycan dili və ədəbiyyatı fənləri həftədə 5-7 saat tədris olunduğu halda, son bir neçə il ərzində bu dərslərin həftəlik saatlarının sayı 3-ə endirilib. Müəllimlər bildirirlər ki, yeni tədris ilindən etibarən azərbaycandilli məktəblərin gürcü sektorlarında təhsil alan azərbaycanlı şagirdlər üçün həftədə 2 saat keçirilən Azərbaycan dili və ədəbiyyatı dərsləri də tamamilə ləğv edilib. Təhsil ictimaiyyətinin nümayəndələri hesab edirlər ki, bu dəyişiklik azərbaycanlı şagirdlərin ana dilini öyrənməsi və inkişaf etdirməsi baxımından ciddi problemlər yarada bilər. Onların fikrincə, Azərbaycan dili və ədəbiyyatının tədris saatlarının daha da azaldılması gələcək nəsillərin ana dili üzrə bilik və bacarıqlarına mənfi təsir göstərə bilər. Müəllimlər mövcud çətinliklərə baxmayaraq, Azərbaycan dilinin məktəblərdə ən azı həftədə 2 saat tədris olunmasının vacib olduğunu vurğulayırlar. Onlar hesab edirlər ki, ana dilinin tədrisindən ayrılan saatların minimum həddə belə qorunması gələcək nəsillərin dil biliklərinin saxlanılması baxımından mühüm əhəmiyyət daşıyır. Məsələ ilə bağlı Gürcüstanda fəaliyyət göstərən Maarif təşkilatının rəhbəri Aygül İsayeva da açıqlama verib. O bildirib ki, məsələ ilə bağlı ölkənin Təhsil, Elm və Gənclər Nazirliyinə müraciət olunub. Aygül İsayeva qeyd edib ki, Azərbaycan dili fənninin dərs saatlarının azaldılması digər fənlərin hesabına həyata keçirilir. Onun sözlərinə görə, bu məsələ ilə bağlı müvafiq qurumlarla müzakirələrin aparılması və problemin həlli istiqamətində addımların atılması vacibdir. Müəllimlər və təhsil sahəsində fəaliyyət göstərən şəxslər Azərbaycan dilinin tədris saatlarının yenidən nəzərdən keçirilməsini və azərbaycandilli məktəblərdə ana dilinin öyrənilməsi üçün daha əlverişli şərait yaradılmasını istəyirlər. Müəllimlərin sözlərinə görə, Gürcüstandakı azərbaycandilli məktəblərə Azərbaycan dili və ədəbiyyatı üzrə dərsliklər hər il Azərbaycandan göndərilir. Lakin mövcud dərs saatları bu vəsaitlərin tam və keyfiyyətli şəkildə mənimsənilməsi üçün kifayət etmir. Bildirilir ki, həftədə cəmi 3 saat dərs keçməklə dərsliklərdə nəzərdə tutulan bütün mövzuları bir tədris ili ərzində əhatə etmək çətindir. Mövzu ilə bağlı daha ətraflı əməkdaşlarımızın hazırladığı reportajı təqdim edirik:

www.24news.ge

Gürcüstanda azərbaycandilli məktəblərdə ana dili dərslərinin azaldılması narahatlıq doğurur (VİDEO)

Digər xəbərlər