Gürcüstanda 1,7 milyard dollarlıq SES layihələri tikiləcək

2036-cı ilədək Gürcüstanın elektrik enerjisi sektoru tam özünütəmin edən səviyyəyə çatmalıdır. 24News.ge xəbər verir ki, bu barədə Gürcüstan hökumətinin yaydığı məlumatda bildirilib. Hökumətin məlumatına görə, bu məqsəd enerji sektorunun uzunmüddətli inkişaf strategiyası və 10 illik fəaliyyət planında nəzərdə tutulub. Strategiyanın əsas məqsədi tam enerji suverenliyinə nail olmaq və elektrik enerjisi idxalından asılılığı azaltmaqdır. Strategiya çərçivəsində enerji infrastrukturunun, o cümlədən yarımstansiyaların və elektrikötürücü xətlərin tikintisi və modernləşdirilməsi planlaşdırılır. Həmçinin iri hidroenergetika layihələrinin inkişafı prioritet istiqamətlərdən biri kimi müəyyən edilib. Bu çərçivədə “Xudon”, “Namaxvani” və “Nenskra” SES layihələri qeyd olunur. Hökumətin qiymətləndirməsinə görə, bu layihələrin həyata keçirilməsi elektrik şəbəkəsinin strukturunu və ölkənin yerli enerji istehsalı imkanlarını əhəmiyyətli dərəcədə dəyişə bilər. Hökumətin məlumatına əsasən, Gürcüstanda ümumi elektrik enerjisi istehsalının 70-80 faizi su elektrik stansiyalarının payına düşür. SES-lərin istehsal gücü isə çayların təbii hidroloji rejimindən asılıdır. Su ehtiyatlarının bol olduğu dövrlərdə Gürcüstan daxili tələbatını tam ödəyir və elektrik enerjisi ixrac edir. Qış aylarında isə çayların su səviyyəsinin azalması səbəbindən yaranan enerji çatışmazlığı idxal olunan qazla işləyən istilik elektrik stansiyaları və birbaşa elektrik enerjisi idxalı hesabına qarşılanır. Hökumət hesab edir ki, bu problemin əsas həll yollarından biri su anbarlarına malik SES-lərin inkişaf etdirilməsidir. Belə stansiyalar su bolluğu dövründə su ehtiyatlarını toplayaraq qış aylarında həmin enerji potensialından istifadə etməyə imkan verəcək. Hazırda ümumi quraşdırılmış gücü 1000 meqavatdan çox olan hidroelektrik stansiya layihələri texniki-iqtisadi araşdırma mərhələsindədir. Bu layihələr üzrə ümumi ehtimal olunan investisiyanın 1,7 milyard dollar olduğu bildirilir. Bununla yanaşı, ümumi gücü 360 meqavat olan hidroelektrik stansiyaların tikintisi artıq başlayıb. Bu layihələrə yatırılacaq investisiyanın 500 milyon dollardan çox olacağı gözlənilir. Gürcüstan hökumətinin açıqlamasına görə, yeni enerji istehsalı güclərinin yaradılması ölkənin enerji suverenliyi və təhlükəsizliyi baxımından strateji əhəmiyyət daşıyır.

www.24news.ge

Gürcüstanda 1,7 milyard dollarlıq SES layihələri tikiləcək

Digər xəbərlər