Paşinyan: Ermənistan İran və Gürcüstanla dostluq münasibətlərini dərinləşdirməklə yanaşı, Azərbaycan və Türkiyə ilə də...

Ermənistan çoxvektorlu xarici siyasət həyata keçirir və bunu balanslaşdırılmış xarici siyasət adlandırır. 24News.ge xəbər verir ki, bunu Ermənistanın Baş naziri Nikol Paşinyan Şanxay Əməkdaşlıq Təşkilatının sammiti çərçivəsində çıxışı zamanı bildirib. Paşinyanın sözlərinə görə, bu siyasətin mahiyyəti ondan ibarətdir ki, hər hansı bir geosiyasi qütbün təsiri ölkənin müstəqilliyini təhlükə altına salacaq qədər gücləndikdə, İrəvan digər qütblə münasibətləri aktivləşdirir və bununla da suverenlik və müstəqillik yolunda balansı qorumağa çalışır. “Belə siyasətin əsas məqsədi suverenliyi və müstəqilliyi qorumaq və möhkəmləndirməkdir. Biz belə nəticəyə gəldik ki, münaqişə şəraitində yaşayaraq müstəqilliyə və suverenliyə sahib olmaq mümkün deyil. Bu baxımdan, çoxqütblülük ilk növbədə yaşadığın regionda özünü göstərməlidir”, – deyə Paşinyan bildirib. Ermənistan Baş naziri qeyd edib ki, İran və Gürcüstanla dostluq münasibətlərini dərinləşdirməklə yanaşı, ölkəsi digər iki qonşusu – Azərbaycan və Türkiyə ilə də dövlətlərarası münasibətlər qurur. Paşinyan bildirib ki, Ermənistan və Azərbaycan arasında ötən il avqustun 8-də ABŞ Prezidenti Donald Trampın dəstəyi və iştirakı ilə əldə olunan sülh razılaşması bu prosesin daha da konkretləşməsinə imkan verib. Onun sözlərinə görə, hazırda Ermənistan Azərbaycan və Türkiyə ilə dövlətlərarası kommunikasiyaların açılması üzərində işləyir. Bu prosesdə “Tramp marşrutu” layihəsinin həyata keçirilməsi də nəzərdə tutulur. Paşinyan qeyd edib ki, layihənin praktiki icrasına yaxın aylarda başlanması planlaşdırılır. Onun sözlərinə görə, bu, yalnız şərqdən qərbə – Xəzər dənizindən Aralıq dənizinə qədər deyil, həmçinin cənubdan şimala yeni nəqliyyat imkanlarının yaranmasına, Fars körfəzi ilə Qara dənizin əlaqələndirilməsinə şərait yaradacaq. “Beləliklə, layihənin həyata keçirilməsindən regionun bütün ölkələri faydalanacaq”, – deyə Paşinyan vurğulayıb.

www.24news.ge

Paşinyan: Ermənistan İran və Gürcüstanla dostluq münasibətlərini dərinləşdirməklə yanaşı, Azərbaycan və Türkiyə ilə də...

Digər xəbərlər