Gürcüstanda məktəblər üçün 750-yə yaxın modul tikilinin alınması planlaşdırılır

Gürcüstanın İnfrastruktur Nazirliyinin Bələdiyyə İnkişaf Fondu ölkə üzrə müvəqqəti modul məktəb infrastrukturu yaratmağı planlaşdırır. 24News.ge xəbər verir ki, bu məqsədlə modul tikililərin satın alınması üçün artıq tender elan edilib. Nazirliyin məlumatına görə, layihə çərçivəsində ümumilikdə 750-yə yaxın modul alınacaq. Onlardan 600-ü sinif otaqları, 100-ü inzibati, 50-si isə sanitar qovşaqlar üçün nəzərdə tutulub. Nazirlikdən bildirilib ki, modul məktəblər fabrikdə əvvəlcədən hazırlanmış, tam təchiz olunmuş və daşına bilən tədris məkanlarından ibarət məktəb kompleksləridir. Onların qısa müddət ərzində müvafiq ərazidə quraşdırılması mümkündür. Bu modullardan yeni məktəb binalarının tikintisi və ya mövcud məktəblərin təmiri zamanı şagirdlər üçün müvəqqəti tədris məkanına ehtiyac yaranan təhsil müəssisələrində istifadə olunacaq. Layihənin əsas məqsədi tikinti və təmir işləri zamanı şagirdlər üçün təhlükəsiz və tam təchiz olunmuş müvəqqəti tədris mühiti yaratmaq, təhsil prosesinin dayanmasının qarşısını almaq və şagirdlərin digər məktəblərə köçürülməsi ehtiyacını minimuma endirməkdir. Məlumata görə, modul məktəblər şagirdlərin məktəbin öz ərazisində və ya ona yaxın ərazidə təhsillərini davam etdirməsinə imkan verəcək. Bu isə digər məktəblərə köçürülmə və gündəlik nəqliyyat ehtiyacını azaldacaq. Layihə çərçivəsində istifadəyə hazır məktəb modullarının alınması və zərurət yarandıqda ərazidə quraşdırılması nəzərdə tutulur. Ehtiyac olduqda müvafiq ərazilərdə xarici mühəndis-kommunikasiya infrastrukturu da yaradılacaq. Hər bir sinif modulu 10-12 şagird və bir müəllim üçün nəzərdə tutulacaq. İnzibati modullarda məktəb rəhbərliyi, mandatur və həkim üçün iş otaqları, həmçinin təsərrüfat təyinatlı otaqlar və sanitar qovşaqlar yerləşdiriləcək. Modullar ehtiyaca uyğun ölçüdə vahid məktəb məkanı yaratmaq üçün bir-birinə birləşdirilə biləcək. Zərurət yaranarsa, onların müxtəlif konfiqurasiyada və iki mərtəbəli formada quraşdırılması da mümkün olacaq. Bütün modullar elektrik təchizatı, işıqlandırma, istilik-soyutma, yanğın təhlükəsizliyi, videomüşahidə və informasiya-kommunikasiya sistemləri ilə təchiz ediləcək. Həmçinin onlar fiziki məhdudiyyətli şəxslərin istifadəsi üçün tam uyğunlaşdırılacaq. Modul məktəb infrastrukturu təkrar istifadə üçün nəzərdə tutulur. Müəyyən məktəbdə ehtiyac aradan qalxdıqdan sonra modullar sökülərək başqa əraziyə daşına və yenidən quraşdırıla biləcək. Nazirlik qeyd edir ki, bu cür müvəqqəti modul tədris məkanlarından Avropa ölkələrində, xüsusilə məktəblərin tikintisi və təmiri zamanı geniş istifadə olunur.

www.24news.ge

Gürcüstanda məktəblər üçün 750-yə yaxın modul tikilinin alınması planlaşdırılır

Digər xəbərlər