Bakıda Azərbaycan və Gürcüstan arasında dini sahədə əməkdaşlığın perspektivləri müzakirə olunub (FOTO)

Azərbaycan və Gürcüstan arasında mövcud yüksək səviyyəli əməkdaşlıq regionda sülh və təhlükəsizliyin təmin olunmasına mühüm töhfə verir və dini sahədə birgə layihələrin bundan sonra da uğurla davam etdirilməsi üçün geniş imkanlar yaradır. 24News.ge xəbər verir ki, bu barədə Bakıda Azərbaycanın Dini Qurumlarla İş üzrə Dövlət Komitəsində Gürcüstanın Dini Məsələlər üzrə Dövlət Agentliyinin sədri Zaza Vaşakmadzenin başçılıq etdiyi nümayəndə heyəti ilə görüşdə bildirilib. Görüşdə iki ölkə arasındakı münasibətlərinin dərin tarixi köklərə, qarşılıqlı etimad və sarsılmaz dostluğa əsaslandığı, hər iki ölkə prezidentinin nümayiş etdirdiyi siyasi iradə və strateji baxış sayəsində əlaqələrin bütün istiqamətlərdə yüksələn xətlə inkişaf etdiyi vurğulanıb. Görüş zamanı Azərbaycan nümayəndə heyəti əsası Ulu Öndər Heydər Əliyev tərəfindən qoyulmuş və Prezident İlham Əliyevin uğurla davam etdirdiyi nümunəvi dövlət-din siyasəti nəticəsində ölkədə müxtəlif dinlərin, məzhəblərin və etnik qrupların dinc yanaşı və qarşılıqlı hörmət şəraitində birgə yaşamasının təmin olunduğu qeyd olunub. Bütün dini konfessiyaların, o cümlədən gürcü pravoslav xristian dini icmasının nümayəndələrinin dini etiqad azadlığının qanunvericiliklə tam təmin edildiyi, onların dini ayin və ibadətlərini sərbəst həyata keçirmələri üçün zəruri şəraitin yaradıldığı diqqətə çatdırılıb. Gürcüstan nümayəndə heyətinin üzvləri Azərbaycan-Gürcüstan münasibətlərinin mövcud yüksək səviyyəsindən məmnunluğunu ifadə edərək, ölkələr arasında dini sahədə əməkdaşlığın daha da inkişaf etdirilməsinin əhəmiyyətini qeyd ediblər. Gürcüstanda yaşayan azərbaycanlıların milli-mənəvi və dini dəyərlərinin qorunması istiqamətində görülən işlərin təqdirəlayiq olduğu vurğulanıb. Görüşdə qarşılıqlı əməkdaşlığın intensivləşdirilməsi, təcrübə mübadiləsinin gücləndirilməsinin vacibliyi diqqətə çatdırılıb. Qeyd edək ki, görüşdə Gürcüstanın Dini Məsələlər üzrə Dövlət Agentliyinin sədri Zaza Vaşaqmadze, Gürcüstanın xalq müdafiəçisi Levan İoseliani, Bütün Gürcüstan Müsəlmanları İdarəsinin şeyxi Hacı Faiq Nəbiyev, idarənin Şərqi Gürcüstan üzrə müftisi Hacı Etibar Eminov və Qərbi Gürcüstan üzrə müftisi Hacı Adəm Şantadze və digər din xadimləri iştirak ediblər.

www.24news.ge

Bakıda Azərbaycan və Gürcüstan arasında dini sahədə əməkdaşlığın perspektivləri müzakirə olunub (FOTO)

Digər xəbərlər