Tbilisidə İranın mərhum Ali dini liderinin vəfatının 40-cı günü ilə bağlı mərasim keçirilib (FOTO)

İran İslam Respublikasının Gürcüstandakı səfirliyində İranın mərhum ali dini lideri Ayətullah Seyid Əli Xameneinin vəfatının 40-cı günü ilə bağlı mərasim keçirilib. 24News.ge xəbər verir ki, mərasimdə diplomatik korpusun nümayəndələri, elm və ictimaiyyət xadimləri, eləcə də din xadimləri iştirak ediblər. İran İslam Respublikasının Gürcüstandakı səfiri Seyid Əli Moujani tədbirdə iştirak edən qonaqlar qarşısında çıxış edərək şiə mədəniyyətində “40” ənənəsinin mahiyyətindən danışıb. O bildirib ki, Ərbəin yalnız hər hansı hadisədən 40 gün keçməsini ifadə etmir. Səfirin sözlərinə görə, bu ənənə İmam Hüseynin (ə) şəhadətindən sonra onun ideallarını xatırlamaq və həmin dəyərlərə sədaqəti yeniləmək məqsədi daşıyır. Səfir qeyd edib ki, Ərbəin ənənəsinin tarixi 14 əsr əvvələ gedib çıxır və ilk dəfə İmam Hüseynin (ə) şəhadətindən sonrakı 40-cı gündə özünü göstərib. Onun sözlərinə görə, İmam Hüseynin (ə) mesajı din, məzhəb və etnik mənsubiyyət sərhədlərini aşır. O bildirib ki, insan özünü hər hansı dinin nümayəndəsi hesab etməsə belə, həyatında azadlıq, ləyaqət və cəsarəti əsas dəyərlər kimi seçə bilər. Səfir Tbilisidə azərbaycanlı şiələrlə birlikdə keçirilən tədbirin də bu baxımdan mühüm mesaj daşıdığını vurğulayıb: “İmam Hüseynin (ə) yolunun əbədiliyinin sirri onun həqiqi davamçılarının səmimiyyətində, imanında və onun düşüncəsinə bağlılığındadır. Təsadüfi deyil ki, hər il Kərbəla şəhidlərinin dəfnindən sonrakı 40-cı gündə keçirilən mərasimlər bir növ sədaqətin təsdiqidir”, – deyə o qeyd edib. Səfir çıxışında xalqların tarixinin həm acı, həm də şirin səhifələrdən ibarət olduğunu bildirib. Onun sözlərinə görə, heç bir xalqın tarixi tamamilə eyni xarakter daşımır və hər bir ölkənin tarixində həm qürurverici, həm də ağır hadisələrə rast gəlmək mümkündür. O, tarixi dönüş nöqtələrində insanların və liderlərin davranışının xüsusi əhəmiyyət daşıdığını vurğulayıb. Səfir çıxışında 2017-ci ilin avqustunda Gürcüstanda baş verən genişmiqyaslı meşə yanğınlarına da toxunub. Onun sözlərinə görə, həmin vaxt Ayətullah Xamenei İran silahlı qüvvələrinin Ali Baş Komandanı kimi yanğınların söndürülməsi və Gürcüstanın təbii sərvətlərinin qorunmasına yardım məqsədilə bir neçə xilasetmə helikopterinin göndərilməsinə göstəriş verib. Səfir bunu qonşu ölkənin əhalisinin ağrı və təhlükəsizliyinin İran üçün əhəmiyyətli olduğunun göstəricisi kimi qiymətləndirib: “Bu gün dünya elə bir vəziyyətdədir ki, kimin prinsiplərin, kimin isə prinsipsizliyin tərəfində olduğu, kimin cəsarət, kimin isə ləyaqətsiz davranış nümayiş etdirdiyi daha aydın görünür”, – deyə səfir bildirib. O əlavə edib ki, vəfat etmiş lideri xatırlamaq yalnız siyasi şəxsiyyəti yad etmək anlamına gəlmir. Səfirin sözlərinə görə, şiəlik irqi, etnik və ya dil əlaqəsi deyil, insanları ortaq dəyərlər və ideallar əsasında birləşdirən mədəniyyətdir. O, həmçinin tədbirdə iştirak edən diplomatik nümayəndələrə, xüsusilə Azərbaycan Respublikasının Gürcüstandakı səfirinə və digər diplomatik nümayəndəliklərin təmsilçilərinə təşəkkürünü bildirib.

www.24news.ge

Tbilisidə İranın mərhum Ali dini liderinin vəfatının 40-cı günü ilə bağlı mərasim keçirilib (FOTO)

Digər xəbərlər