Candar sakinləri mərasim evi tələbi ilə aksiya keçirib (VİDEO)

Marneuli bələdiyyəsinin Candar kəndində sakinlər mərasim evinin tikilməsi tələbi ilə etiraz aksiyası keçiriblər. Kənd əhalisi mərasim evinin inşa olunmasını istədikləri boş torpaq sahəsinə toplaşaraq aidiyyəti qurumlardan problemin həllini tələb edib. 24News.ge xəbər verir ki, sakinlərin sözlərinə görə, sözügedən torpaq sahəsinin bəzi şəxslər tərəfindən biznes məqsədilə mənimsənilməsinə cəhd göstərilir. Onlar bununla bağlı artıq Marneuli meriyasına rəsmi müraciət etdiklərini bildirərək etirazlarını ifadə ediblər. Aksiya zamanı Bağçalar Birliyinin sədri Zaur Kərəmov etirazçılarla görüşərək Marneuli meri Daur İsmayılovun sakinlərlə görüşmək istədiyini və bu məqsədlə onları meriyaya dəvət etdiyini bildirib. Lakin aksiya iştirakçıları bu təkliflə razılaşmayaraq görüşün kənddə keçirilməsini tələb ediblər. Sakinlər merin şəxsən əraziyə gəlməsinin daha məqsədəuyğun olduğunu bildirərək meriyaya getmək istəmədiklərini vurğulayıblar. Sakinlərin təkidindən sonra Marneuli meri Daur İsmayılov aksiyanın keçirildiyi əraziyə gələrək kənd əhalisi ilə görüşüb. Görüş zamanı mer bildirib ki, sakinlərin mərasim evi üçün nəzərdə tutduqları torpaq sahəsində qüvvədə olan qanunvericiliyə əsasən tikinti işlərinin aparılması mümkün deyil. O qeyd edib ki, kənd sakinləri alternativ ərazi təklif edərlərsə, həmin yer araşdırılacaq və məsələyə qanunvericiliyə uyğun şəkildə baxılacaq. Görüş zamanı tərəflər arasında məsələ ətrafında fikir mübadiləsi aparılıb, problemin mümkün həlli yolları müzakirə olunub.

www.24news.ge

Candar sakinləri mərasim evi tələbi ilə aksiya keçirib (VİDEO)

Digər xəbərlər