Qızılhacılı kəndində kommunal problemlərlə yanaşı çörək qıtlığı yaşanır

Marneuli bələdiyyəsinin Qızılhacılı kəndində iki gündür davam edən təbii qaz problemi sakinlərin gündəlik həyatına ciddi təsir göstərir. Qaz təchizatının dayandırılması nəticəsində kənddə sosial və məişət problemləri hər keçən gün daha da dərinləşir. 24News.ge xəbər portalına daxil olan məlumata əsasən, hazırda yüzlərlə ailə təbii qazın olmaması səbəbindən ciddi kommunal çətinliklərlə üz-üzə qalıb. Sakinlər bildirirlər ki, xüsusilə yemək bişirilməsi, isti su təminatı və digər məsələlərlə bağlı problemlər ailələrin gündəlik həyatını çətinləşdirib. Kənd sakinlərinin sözlərinə görə, qazın verilməməsi təkcə məişət sahəsində deyil, həm də yerli sahibkarlıq fəaliyyətində öz mənfi təsirini göstərir. Mövcud vəziyyət Qızılhacılı kəndində fəaliyyət göstərən çörəkbişirmə sexlərinin işində ciddi çətinliklər yaradıb. Nəticədə bəzi istehsal müəssisələri fəaliyyətlərini məhdudlaşdırmağa məcbur olub, bu isə bir sıra mağazalarda çörək qıtlığının yaranmasına səbəb olub. Sakinlər problemin qısa zamanda həll olunmasını və aidiyyəti qurumların məsələyə operativ müdaxilə etməsini tələb edirlər. Onların sözlərinə görə, yay mövsümünə baxmayaraq, təbii qazın olmaması gündəlik həyatın bir çox sahələrində ciddi narahatlıq yaradır. Məlumat üçün bildirək ki, iyunun 9-dan etibarən Marneuli bələdiyyəsinin Qızılhacılı kəndində, eləcə də Marneuli şəhərinin 26 May küçəsinin bir hissəsində təbii qazın verilməsi dayandırılıb. Ərazini təbii qazla təmin edən “Mamed Gaz” şirkəti açıqlamasında bildirib ki, qaz təchizatının dayandırılması təbii qazın qiymətinin artırılması ilə bağlı tərəflər arasında razılığın əldə olunmaması səbəbindən “SOCAR Export” şirkəti tərəfindən həyata keçirilib. SOCAR şirkətindən verilən açıqlamada isə yaranmış vəziyyətə görə məsuliyyətin “Mamed Gas” MMC-nin üzərinə düşdüyü vurğulanıb. Şirkətin məlumatına görə, 2020-ci ildən bu günədək “Mamed” MMC üçün sosial qazın tarifi dörd dəfə dəyişdirilib və hər dəfə yeni qiymətlərlə bağlı müxtəlif fikir ayrılıqları yaranıb. SOCAR bildirir ki, bəzi hallarda şirkət yenilənmiş tarifləri qəbul etsə də, digər hallarda uzun müddət ərzində yeni qiymətləri tətbiq etməyərək ödənişləri köhnə – 2020-ci il tarifi əsasında həyata keçirib. Açıqlamada qeyd olunur ki, bunun nəticəsində “Mamed” MMC-nin istifadə etdiyi təbii qaza görə əhəmiyyətli həcmdə borcu formalaşıb. Hazırda tərəflər arasında yaranmış mübahisənin nə vaxt həll olunacağı və qaz təchizatının nə zaman bərpa ediləcəyi ilə bağlı rəsmi məlumat verilməyib.

www.24news.ge

Qızılhacılı kəndində kommunal problemlərlə yanaşı çörək qıtlığı yaşanır

Digər xəbərlər