Ceyhun Məhəmmədəli: “Bu qədər əhəmiyyətli bölgə niyə diqqətdən kənardadır?”

İctimai fəal və siyasətçi Ceyhun Məhəmmədəli Marneuli şəhəri və Qızılhacılı kəndində baş verən təbii qaz və elektrik enerjisi kəsintisi ilə bağlı tənqidi paylaşım edib. 24News.ge xəbər verir ki, "facebook" sosial media hesabında paylaşım edən siyasətçi bildirib ki, artıq təxminən 50 saatdır Marneuli şəhərinin böyük hissəsinə və Qızılhacılı kəndinə təbii qaz verilmir. Eyni zamanda kəndin yarıdan çoxunda elektrik enerjisinin də olmadığı qeyd olunur. Məhəmmədəli vəziyyəti tənqid edərək bölgənin həm hakimiyyət, həm də müxalifət tərəfindən seçki baxımından mühüm hesab edildiyini, lakin buna baxmayaraq sosial infrastruktur problemlərinin ciddi şəkildə davam etdiyini vurğulayıb: "Bu gün artıq 50 saatdır ki, Marneuli şəhərinin böyük hissəsinə və Qızılhacılı kəndinə təbii qaz verilmir. Eyni zamanda Qızılhacılı kəndinin yarıdan çoxunda elektrik enerjisinin də olmadığı bildirilir. İndi gedin xalqa “mənim Gürcüstanım buradadır” mahnısını oxudun... Halbuki həm hakimiyyət, həm də müxalifət bu regionu seçici baxımından ən mühüm bölgələrdən biri hesab edir. Lakin görünən odur ki, bu qədər əhəmiyyətli sayılan bölgə eyni zamanda ən çox diqqətdən kənarda qalan və ən çox çətinlik yaşayan ərazilərdən biridir", - deyə C. Məhəmmədəli qeyd edib. O, paylaşımında həmçinin ironik şəkildə gündəlik məişət çətinliklərinə toxunaraq, elektrik və qaz olmadan insanların xüsusilə isti hava şəraitində məişət ehtiyaclarını necə qarşılamasının sual doğurduğunu qeyd edib: "Səhər su olmadığından başımı yumaq istəyərkən, problemi müvəqqəti olaraq “Tefal”da su qızdırmaqla həll etdim. Maraqlıdır, elektrik olmayan evlərdə insanlar bu vəziyyətdə suyu necə qızdırmalıdırlar, xüsusilə də bu yayın istisində?", - deyə siyasətçi vurğulayıb.

www.24news.ge

Ceyhun Məhəmmədəli: “Bu qədər əhəmiyyətli bölgə niyə diqqətdən kənardadır?”

Digər xəbərlər