Qızılhacılı kəndində təbii qaz kəsilib - Paylayıcı şirkət baş verənləri belə izah edir....

Bu gün səhər saatlarından etibarən Marneuli bələdiyyəsinin Qızılhacılı kəndində və Marneuli şəhərinin 26 May yaşayış massivinin bir hissəsində təbii qazın verilişi dayandırılıb. Bu barədə 24News.ge xəbər portalına kənd sakinləri məlumat veriblər. Sakinlərin sözlərinə görə, ərazini təbii qazla təmin edən “Mamed Gaz” şirkəti abonentlərinə göndərdiyi SMS bildirişində qaz təchizatının 9 iyun 2026-cı il saat 11:00-dan etibarən dayandırıldığını bildirib. Abonentlərə göndərilən məlumatda qeyd olunub ki, təbii qazın qiymətinin artırılması ilə bağlı razılıq əldə olunmadığı üçün “SOCAR Export” şirkəti tərəfindən qaz təchizatı dayandırılıb. Məsələ ilə bağlı 24News.ge-nin sorğusunu cavablandıran “Mamed Gaz” şirkətinin rəhbəri Nəriman Allahverdiyev bildirib ki, qaz təchizatı SOCAR tərəfindən qiymət artımı ilə əlaqədar dayandırılıb. Onun sözlərinə görə, ötən il bağlanmış müqaviləyə əsasən 1000 kubmetr təbii qazın qiyməti 250 lari müəyyən edilib və ödənişlər də həmin tarif üzrə həyata keçirilib. Lakin sonradan SOCAR tərəfindən müqavilədə nəzərdə tutulmayan əlavə qiymət artımı tətbiq olunub və nəticədə 1000 kubmetr qazın dəyəri 350 lari hesablanmağa başlanıb. Nəriman Allahverdiyev bildirib ki, məsələ ilə bağlı məhkəməyə müraciət edib, lakin məhkəmə qərar verməmişdən əvvəl qaz təchizatı dayandırılıb. Şirkət rəhbərinin sözlərinə görə, qazın verilişi “Mamed Gaz” tərəfindən deyil, SOCAR-ın müraciəti əsasında aidiyyəti qurumlar tərəfindən dayandırılıb. “Mamed Gaz” şirkətinin rəhbəri Nəriman Allahverdiyev yaranmış vəziyyətin nə qədər davam edəcəyinin onlardan asılı olmadığını bildirib. Qeyd edək ki, məsələ ilə bağlı qarşı tərəfin mövqeyini dərc etməyə hazırıq. SOCAR-ın rəsmi açıqlaması əldə olunacağı təqdirdə xəbər yenilənəcək.

www.24news.ge

Qızılhacılı kəndində təbii qaz kəsilib - Paylayıcı şirkət baş verənləri belə izah edir....

Digər xəbərlər