BGMİ-nin din rəhbərləri İrana səfərləri çərçivəsində bir sıra görüşlər keçiriblər (FOTO)

İran İslam Respublikasına səfər edən Bütün Gürcüstan Müsəlmanları İdarəsinin (BGMİ) din rəhbərləri — şeyx Hacı Faiq Nəbiyev, idarənin Şərqi Gürcüstan üzrə müftisi Hacı Etibar Eminov və Qərbi Gürcüstan üzrə müftisi Hacı Adəm Şantadze, eləcə də nümayəndə heyəti bir sıra rəsmi görüşlər keçiriblər. 24News.ge xəbər verir ki, səfərin beşinci günündə heyət Tehranda İranın Ali Dini Lideri Ayətullah Seyid Əli Xameneinin beynəlxalq münasibətlər şöbəsinin müdiri Ayətullah Mohsen Qömi, “İslam Mədəniyyəti və Əlaqələri Təşkilatı”nın rəhbəri Höccətül-islam vəl-müslimin İmani Pur, həmçinin Əhli-Beyt (ə) Dünya Assambleyasının sədri Ayətullah Ramazani ilə geniş tərkibli görüşlər keçirib. Görüşlər zamanı tərəflər qarşılıqlı maraq doğuran məsələləri, xüsusilə də İslam dünyasında qarşılıqlı anlaşmanın gücləndirilməsi, dini qurumlar arasında əməkdaşlığın dərinləşdirilməsi və iki ölkə arasında mədəni əlaqələrin genişləndirilməsi mövzularını müzakirə ediblər. Səmimi və dostluq ab-havasında keçən görüşlərdə nümayəndə heyəti göstərilən yüksək səviyyəli qonaqpərvərliyə görə İran tərəfinə təşəkkürünü ifadə edib. Onlar səfərin fövqəladə faydalı olduğunu və iki ölkə arasında mövcud əlaqələrin daha da inkişaf etdirilməsi üçün yeni imkanlar yaratdığını qeyd ediblər. Müzakirələr zamanı müasir dövrdə qlobal miqyasda artan islamofobiya hallarının təhlükələri, müxtəlif məzhəblər arasında qarşıdurma yaratmaq üçün göstərilən cəhdlər və bu tendensiyaların qarşısının alınmasında dini xadimlərin həmrəylik nümayiş etdirməsinin əhəmiyyəti vurğulanıb. Tərəflər bu istiqamətdə birgə fəaliyyətlərin gücləndirilməsinin zəruriliyinə xüsusi diqqət yönəldiblər. Görüşdə həmçinin mədəni, elmi-tədris və dini sahələrdə əməkdaşlığın daha da inkişaf etdirilməsi, müştərək layihələrin həyata keçirilməsi və gənc din xadimlərinin maarifləndirilməsi üzrə birgə təşəbbüslərin genişləndirilməsi barədə fikir mübadiləsi aparılıb. İranlı din və hökumət nümayəndələri Gürcüstan hökumətinin ölkədə yaşayan müsəlman icmasına yaratdığı əlverişli şəraitə və göstərdiyi maddi-mənəvi dəstəyə görə yüksək təqdirlərini bildiriblər. Onlar bu siyasətin regionda dini həmrəyliyin və tolerantlığın möhkəmlənməsinə xidmət etdiyini vurğulayıblar. Görüşün sonunda tərəflər gələcək əməkdaşlıq istiqamətləri, institusional əlaqələrin genişləndirilməsi və birgə fəaliyyətlərin davam etdirilməsi ilə bağlı ortaq iradələrini ifadə ediblər. Daha sonra xatirə şəkilləri çəkilib və qarşılıqlı simvolik hədiyyələr təqdim olunub. Səfər çərçivəsində qonaqlar son illərdə beynəlaxlaq aləmdə tanınan Quran Mehfel televiziya proqramının studiyasında da qonaq olublar. Burada bildirilib ki, Proqramın məqsədi Quranı geniş kütləyə tanıtmaq, Quran tilavəti vasitəsilə insanlarda dini-ruhani bağlılığı artırmaqdır. Mehfel təkcə tilavət deyil — proqramda tilavətlə yanaşı, islami mövzular, Quran ayələrinin gündəlik həyata tətbiqi kimi mövzular da müzakirə olunur. Bildirilib ki, Proqram həm peşəkar və tanınmış Quran qari’ləri (tilavətçiləri), həm də uşaqlar və gənclər daxil olmaqla geniş iştirakçı spektri ilə işləyir və Mehfel-in təsiri yalnız İranla məhdudlaşmır — proqram çərçivəsində Quranla bağlı konsertlər, tədbirlər bir sıra xarici ölkələrdə də təşkil olunur. Görüşdə proqramla bağlı Gürcüstanda tədbirlərin keçirilməsi məsələsi də müzakirə olunub. Bildirilib ki, həm Gürcüstanda, həm də dünyanın istənilən yerində Quran bacarığı olan şəxslər bu proqrama qoşula bilərlər. Qeyd edək ki, BGMİ-nin din rəhbərlərinin İran İslam Respublikasına səfəri davam edir və səfər çərçivəsində daha bir sıra görüşlər planlaşdırılıb.

www.24news.ge

BGMİ-nin din rəhbərləri İrana səfərləri çərçivəsində bir sıra görüşlər keçiriblər (FOTO)

Digər xəbərlər