Gürcüstanın xalq müdafiəçisi kazinolarda beynəlxalq qumar turnirlərinin keçirilməsinə qarşı çıxıb

Gürcüstanın xalq müdafiəçisi parlamenti kazinolarda beynəlxalq qumar turnirlərinin keçirilməsinə imkan verən qanun layihələrinin qəbulunu davam etdirməməyə çağırıb. 24News.ge xəbər verir ki, xalq müdafiəçisi bildirib ki, cəmiyyət üçün həssas olan bu məsələnin müvafiq ekspertlərin iştirakı və insan hüquqlarına mümkün təsirlərin riskləri hərtərəfli qiymətləndirilmədən sürətlə müzakirə edilməsi xüsusilə zərərlidir. “Qumar oyunları insanın fundamental hüquqlarına ciddi mənfi təsir göstərir. Ümumdünya Səhiyyə Təşkilatı qumar oyunlarını ictimai sağlamlıq problemi kimi qiymətləndirir və psixi sağlamlığın pisləşməsi, yetkinlik yaşına çatmayanlara təsir, maliyyə çətinlikləri, ailədaxili münaqişələr və intihar riskinin artması kimi mümkün nəticələri vurğulayır. Təşkilat qumar oyunlarının reklamına, əlçatanlığına və qumar biznesinə nəzarətə dair effektiv tədbirlərin görülməsini tövsiyə edir”, – deyə xalq müdafiəçisinin bəyanatında qeyd olunub. Bəyanatda bildirilir ki, qanun layihəsinin izahat sənədinə əsasən, dəyişikliklərin məqsədi turizmin inkişafı, xarici iştirakçıların turnirlərə cəlb edilməsi və iqtisadi fəallığın artırılmasıdır. Lakin xalq müdafiəçisinin fikrincə, sənəddə bir sıra mühüm məsələlər əhatə olunmayıb. Belə ki: İctimai sağlamlığa təsirlə bağlı ayrıca qiymətləndirmə aparılmayıb; Mümkün sosial zərər və onun qarşısının alınması xərcləri təhlil edilməyib; Qanun layihəsinin hazırlanmasında müvafiq ekspertlərin və təşkilatların iştirakı təmin olunmayıb; Digər ölkələrin təcrübəsi nəzərdən keçirilməyib; İzahat sənədində qanun layihəsinin uşaqların hüquqlarına təsir göstərməyəcəyi bildirilsə də, bu qiymətləndirmənin hansı əsaslara söykəndiyi açıqlanmayıb. Xalq müdafiəçisi vurğulayıb ki, bu tip qanun layihələri müzakirə edilərkən məsələnin hərtərəfli və əhatəli araşdırılması, müvafiq sahə üzrə ekspertlərin geniş və lazımi səviyyədə iştirakı xüsusi əhəmiyyət daşıyır. Bəyanatda, həmçinin qeyd olunub ki, təklif edilən dəyişikliklərin qiymətləndirilməsi yalnız maddi faydanın müəyyənləşdirilməsi ilə məhdudlaşmamalı, onların sağlamlığa və sosial rifaha mümkün təsirləri, eləcə də əlaqəli risklər lazımi qaydada nəzərə alınmalıdır. Məlumat üçün bildirək ki, ölkə parlamenti “Lotereyalar və qumar oyunlarının təşkili haqqında” qanuna və bununla əlaqədar digər qanunvericilik aktlarına dəyişiklikləri nəzərdə tutan qanun layihəsini bu gün birinci oxunuşda qəbul edib. Dəyişikliklər kazinolara beynəlxalq qumar turnirləri təşkil etmək imkanı verəcək.

www.24news.ge

Gürcüstanın xalq müdafiəçisi kazinolarda beynəlxalq qumar turnirlərinin keçirilməsinə qarşı çıxıb

Digər xəbərlər