Almaniya XİN Gürcüstanda müxalifət partiyalarının qadağan edilməsi ilə bağlı prosesə münasibət bildirib

Almaniya Xarici İşlər Nazirliyi Gürcüstanda müxalifət partiyalarının qadağan edilməsi ilə bağlı Konstitusiya Məhkəməsində baxılan işdən narahatdır. Almaniya tərəfi hesab edir ki, bu proses ölkəni Avropa İttifaqından daha da uzaqlaşdırır və ölkədaxili demokratiyanı zəiflədir. 24News.ge xəbər verir ki, bu barədə Almaniya Xarici İşlər Nazirliyinin sözçüsü Katrin Deşauer açıqlama verib. Onun sözlərinə görə, Almaniya Xarici İşlər Nazirliyi məsələ ilə bağlı narahatlığını Gürcüstan tərəfinə çatdıracaq: “Biz artıq uzun müddətdir ki, Gürcüstanda baş verən hadisələri böyük narahatlıqla izləyirik. Konstitusiya Məhkəməsində baxılan bu iş həmin tendensiyanın növbəti addımıdır. Bu proses ölkəni Avropa İttifaqından daha da uzaqlaşdırır və ölkədaxili demokratiyanı zəiflədir. Bizim qiymətləndirməmiz belədir”, – deyə Deşauer bildirib. O, Avropa Komissiyası və Avropa Şurasının baş katibinin də açıq şəkildə qeyd etdiyi kimi, məhkəmə sistemindən siyasi məqsədlər üçün geniş istifadə olunmasının ciddi problem yaratdığını vurğulayıb: “Federal hökumət və Xarici İşlər Nazirliyi olaraq bu son addımla bağlı narahatlığımızı və şübhələrimizi Gürcüstan tərəfinə mütləq çatdıracağıq. Bu addım ölkənin Avropa İttifaqından daha da uzaqlaşmasına səbəb olur və Gürcüstanın Aİ-yə üzvlük perspektivinə xələl gətirir”, – deyə Almaniya Xarici İşlər Nazirliyinin sözçüsü qeyd edib. Deşauer əlavə edib ki, Gürcüstanın siyasi vəziyyəti Avropa İttifaqının son Xarici İşlər Şurasının iclasında da müzakirə olunub. Onun sözlərinə görə, ölkədəki siyasi vəziyyət uzun müddətdir mürəkkəb olaraq qalır və bu məsələ gələcək müzakirələrdə də diqqət mərkəzində olacaq.

www.24news.ge

Almaniya XİN Gürcüstanda müxalifət partiyalarının qadağan edilməsi ilə bağlı prosesə münasibət bildirib

Digər xəbərlər