GAİM-də yeni tədris mərhələsinə start verilib (FOTO)

Marneulidə fəaliyyət göstərən Gürcüstan Azərbaycanlılarının İnteqrasiya Mərkəzində (GAİM) yeni tədris fəaliyyətinin açılış mərasimi keçirilib. 24News.ge xəbər verir ki, tədbirdə müəllimlər, valideynlər və təhsil sahəsinin nümayəndələri iştirak ediblər. Azərbaycan Evinin və GAİM-in direktoru Məhəbbət İmanov tədbir iştirakçılarını salamlayaraq mərkəzin fəaliyyəti və yeni layihənin məqsədləri barədə məlumat verib. Bildirilib ki, layihə çərçivəsində mental arifmetika Marneulidə ilk dəfə GAİM-də tədris olunacaq. Tədris prosesi təcrübəli müəllim Sayalı İsmayılova tərəfindən həyata keçiriləcək. Yeni tədris proqramı məktəb şagirdləri ilə yanaşı, məktəbəqədər yaşlı uşaqları, abituriyentləri və müəllimləri də əhatə edir. Burada Azərbaycan və gürcü sektorları üzrə tədris, məktəbəqədər və milli imtahanlara hazırlıq, gürcü və ingilis dillərinin tədrisi, fərdi yanaşmaya ehtiyacı olan uşaqlarla iş və psixoloji dəstək istiqamətləri üzrə xidmətlər təqdim olunur. Tədris prosesinə ixtisaslı və təcrübəli müəllimlər cəlb olunub. Dərslərdə sensor lövhələr, müasir texnologiyalar, interaktiv oyunlar və xüsusi hazırlanmış tədris resurslarından istifadə ediləcək. Tədbirdə “AMAKids” və “Sumato” mental arifmetika proqramlarını Gürcüstana ilk gətirən İnqa Nodia da iştirak edib. O, Sayalı İsmayılovanın təşəbbüsü ilə əməkdaşlığın yaradıldığını və onun Marneuli regionunda proqramların yeganə nümayəndəsi olduğunu bildirib. Yeni layihənin məqsədi Marneulidə müasir təhsil imkanlarını genişləndirmək, şagird və abituriyentlərin inkişafına, eləcə də müəllimlərin peşəkar fəaliyyətinə dəstək göstərməkdir.

www.24news.ge

GAİM-də yeni tədris mərhələsinə start verilib (FOTO)

Digər xəbərlər