Avropa Parlamenti Gürcüstanla bağlı sərt qətnamə qəbul edib

Avropa Parlamenti Gürcüstanda müxalifət partiyalarının qadağan edilməsinə cəhdlərlə bağlı qətnamə qəbul edib. 24News.ge xəbər verir ki, Avropa Parlamentinin bu gün keçirilən plenar iclasında “Gürcüstanda hakim partiya – Gürcü Arzusu tərəfindən müxalifət partiyalarının qadağan edilməsinə cəhdlər haqqında” qətnamə səsverməyə çıxarılıb. Qətnamənin lehinə 445 deputat səs verib, 37 deputat əleyhinə çıxıb, 97 deputat isə səsvermədə iştirak etməyib. Qətnamədə Avropa Parlamentinin Gürcüstanda müxalifət partiyalarının qadağan edilməsinə cəhdləri qətiyyətlə pislədiyi və bu partiyalara qarşı Konstitusiya Məhkəməsinə təqdim edilmiş iddianın dərhal geri götürülməsini tələb etdiyi bildirilib. Sənəddə siyasi plüralizmin qorunmasının demokratiyanın əsas şərtlərindən biri olduğu vurğulanıb və legitim siyasi müxalifətin məhkəmə yolu ilə aradan qaldırılmasının demokratiya ilə uyğun olmadığı qeyd edilib. Avropa Parlamenti həmçinin Avropa İttifaqını və üzv dövlətləri “Gürcü Arzusu”nun fəxri sədri Bidzina İvanişvili, Baş nazir İrakli Kobaxidze, parlamentin sədri Şalva Papuaşvili və Tbilisi meri Kaxa Kaladzeyə qarşı sanksiyalar tətbiq etməyə çağırıb. Qətnamədə Gürcüstanda demokratiya, media azadlığı, insan hüquqları və qanunun aliliyi ilə bağlı vəziyyətin pisləşdiyi bildirilib. Avropa Parlamentinin sənədində bu proseslərin ölkənin beynəlxalq öhdəlikləri ilə ziddiyyət təşkil etdiyi qeyd olunub. Bundan əlavə, Avropa Parlamenti bütün siyasi məhbusların, o cümlədən Elene Xoştariya, Mzia Amağlobeli, Mixeil Saakaşvili, Giorgi Baramidze və Nika Melianın, eləcə də dinc etirazlara görə həbs edilən şəxslərin dərhal və qeyd-şərtsiz azad edilməsinə çağırıb. Qətnamədə siyasi motivli “sabotaj” ittihamlarının ləğv edilməsi, siyasi rəqibləri susdurmaq üçün qanunvericilikdən və dövlət institutlarından istifadəyə son qoyulması da tələb olunur. Avropa Parlamenti həmçinin demokratik geriləmə, zorakı repressiyalar və siyasi təqiblərə görə məsuliyyət daşıyan şəxslərə qarşı fərdi sanksiyalar və viza qadağalarının tətbiqi ilə bağlı çağırışını təkrarlayıb. Qətnamədə Avropa Parlamentinin gürcü xalqının Avropa yönümlü istəklərinə dəstək verdiyi bildirilib. Sənəddə siyasi partiyaların qadağan edilməsinə yönəlmiş hər hansı cəhdin Gürcüstanı Avropa İttifaqından daha da uzaqlaşdıracağı və ölkənin Aİ-yə üzvlüyü istiqamətində addımları istisna edəcəyi qeyd olunub.

www.24news.ge

Avropa Parlamenti Gürcüstanla bağlı sərt qətnamə qəbul edib

Digər xəbərlər