Tbilisidə yolların kəsişmələrində yeni qayda tətbiq ediləcək

Tbilisidə nəqliyyatın sıx olduğu və svetoforla tənzimlənməsinə baxmayaraq, keçidi problemli olan kəsişmələrdə “Yellow Box” adlanan yol nişanlanmasının tətbiqi planlaşdırılır. 24News.ge xəbər verir ki, bu barədə Tbilisi meri Kaxa Kaladze şəhər hökumətinin iclasında bildirib. Onun sözlərinə görə, şəhərdə avtomobillərin sayının son illərdə əhəmiyyətli dərəcədə artması nəqliyyat sıxlığını daha da artırıb. Kaladze qeyd edib ki, 2012-ci ilə qədər Tbilisidə təxminən 180 min şəxsi avtomobil olduğu halda, hazırda pik saatlarda şəhərdə 900 minə yaxın avtomobil hərəkət edir. Merin sözlərinə görə, sürücülər qarşıdakı yolun bağlı olduğunu gördükləri halda belə yaşıl işıq zamanı kəsişməyə daxil olur, orada dayanaraq digər istiqamətlərdən gələn avtomobillərin hərəkətinə maneə yaradırlar. Bu isə kəsişmədə və ətraf küçələrdə tıxacın daha da artmasına səbəb olur. Kaladze bildirib ki, Gürcüstanın “Yol hərəkəti haqqında” qanununda da sürücünün yaşıl işıq yandığı halda belə, kəsişmədən keçə bilməyəcəyi və hərəkətə maneə yaradacaq şəkildə orada dayanmasının yolverilməz olduğu qeyd edilir. Onun sözlərinə görə, bu qaydanın inzibati qaydada tətbiqi müəyyən çətinliklər yaradır. Buna görə də beynəlxalq təcrübədə istifadə olunan “Yellow Box” sistemi kəsişmələrdə nəqliyyatın hərəkətinin tənzimlənməsinə kömək edə bilər. Kaxa Kaladze şəhərin müvafiq xidmətinə Daxili İşlər Nazirliyi ilə birlikdə “Yellow Box” sisteminin tətbiqi ilə bağlı işlərə başlanılması barədə tapşırıq verib. Mer hesab edir ki, bu sistemin tətbiqi müəyyən kəsişmələrdə nəqliyyatın hərəkətini nizamlayaraq sürücülərin şəhər daxilində daha rahat hərəkət etməsinə kömək edə bilər.

www.24news.ge

Tbilisidə yolların kəsişmələrində yeni qayda tətbiq ediləcək

Digər xəbərlər