TƏCİLİ: “Oğru aləmi”nə qarşı xüsusi əməliyyat keçirilib – 80 nəfər saxlanılıb (VİDEO)

Daxili İşlər Nazirliyinin Mərkəzi Kriminal Polis Departamentinin əməkdaşları Baş Prokurorluqla birgə son 24 saat ərzində Tbilisi və bölgələrdə genişmiqyaslı polis əməliyyatı keçirib. 24News.ge xəbər verir ki, əməliyyat nəticəsində “oğru dünyası” ilə əlaqədə olan 80 nəfər saxlanılıb. Daha 14 nəfərə isə, o cümlədən penitensiar müəssisədə saxlanılan şəxslərə və ölkə xaricində olan şəxslərə qiyabi qaydada ittiham irəli sürüləcək. Məlumata görə, həmin şəxslər arasında xaricdə olan “qanuni oğru” da var. İstintaqın məlumatına əsasən, hakim qərarı əsasında həyata keçirilən gizli istintaq tədbirləri də daxil olmaqla aparılan araşdırmalar zamanı müəyyən edilib ki, xaricdə olan “qanuni oğru” Giorgi Qoqoladzenin adından və himayəsi altında onun ətrafındakı şəxslər mütəmadi olaraq “oğru razılaşmaları” təşkil edib və qərarlar “oğru ənənələri”nə uyğun qəbul ediblər. İstintaqın məlumatına görə, təqsirləndirilən şəxslər müxtəlif vaxtlarda və müxtəlif məkanlarda tərəflər arasında yaranmış maliyyə mübahisələrinə baxıb, “oğru razılaşması” nəticəsində mübahisə edən tərəflərdən birini digər tərəfin, eləcə də özlərinin xeyrinə müəyyən məbləğdə pul ödəməyə məcbur ediblər. Bildirilib ki, üzərinə qoyulan öhdəliyi yerinə yetirməyən və ya müəyyən edilmiş müddəti pozan şəxslər fiziki zorakılıq və öldürülmə ilə hədələniblər. Hüquq-mühafizə əməkdaşları təqsirləndirilən şəxslərin üzərində, yaşayış evlərində və avtomobillərində axtarışlar aparıb. Axtarışlar zamanı sübut kimi kompüter avadanlıqları və mobil telefonlar götürülüb. Nazirliyin məlumatına görə, həmin vasitələrdən təqsirləndirilən şəxslər bir-biri və xaricdə olan “qanuni oğru” ilə əlaqə saxlamaq üçün istifadə ediblər. Bundan başqa, axtarışlar zamanı odlu silahlar, pul və narkotik vasitələr də aşkarlanaraq götürülüb. Faktla bağlı Cinayət Məcəlləsinin müxtəlif maddələri ilə istintaq aparılır. Saxlanılan şəxsləri 15 ilədək azadlıqdan məhrumetmə cəzası nəzərdə tutulur. Daxili İşlər Nazirliyi təşkilatlanmış cinayətkarlığa, xüsusilə də “oğru dünyası”na qarşı mübarizəni davam etdirəcəyini açıqlayıb.

www.24news.ge

TƏCİLİ: “Oğru aləmi”nə qarşı xüsusi əməliyyat keçirilib – 80 nəfər saxlanılıb (VİDEO)

Digər xəbərlər