Gürcüstandakı dörd alman fondu fəaliyyətini dayandırıb

Almaniyanın Gürcüstandakı səfiri Barbara Posse ölkədə fəaliyyət göstərən dörd Almaniya siyasi fondunun fəaliyyətini müvəqqəti dayandırmağa məcbur olduğunu bildirib. 24News.ge xəbər verir ki, “Azadlıq Radiosu”nun məlumatına görə, söhbət uzun illərdir Gürcüstanda fəaliyyət göstərən Konrad Adenauer, Fridrix Nauman, Henrix Böll və Fridrix Ebert fondlarından gedir. Konrad Adenauer Fondu Almaniyanın Xristian Demokrat İttifaqı (CDU), Fridrix Nauman Fondu Azad Demokrat Partiyası (FDP), Henrix Böll Fondu “Yaşıllar”, Fridrix Ebert Fondu isə Almaniya Sosial Demokrat Partiyası (SPD) ilə əlaqəlidir. Məlumata görə, fondlardan ikisi – Konrad Adenauer və Fridrix Nauman fondları Gürcüstandakı ofislərini bağladıqlarını artıq rəsmi şəkildə açıqlayıblar. Almaniyanın yeni səfiri Barbara Posse bu barədə oktyabrın 2-də Tbilisidə Alman Birliyi Gününə həsr olunmuş tədbirdə danışıb. “Onilliklər ərzində Gürcüstanı və onun xalqını Avropaya inteqrasiya yolunda dəstəkləyən dörd siyasi fondumuz Gürcüstan hökumətinin qərarı səbəbindən fəaliyyətlərini müvəqqəti dayandırmağa məcbur olub”, – deyə səfir bildirib. Barbara Posse əlavə edib ki, baş verənlər Gürcüstanla Avropa İttifaqı arasındakı münasibətlərə də təsir göstərir. Səfir həmçinin diplomatik fəaliyyəti dövründə Almaniya-Gürcüstan münasibətlərinin qorunub saxlanılmasının onun üçün prioritet olacağını vurğulayıb.

www.24news.ge

Gürcüstandakı dörd alman fondu fəaliyyətini dayandırıb

Digər xəbərlər