Sabah 4 bələdiyyədə Sakrebulo üzrə aralıq seçkilər keçiriləcək

Oktyabrın 3-də Vani, Tsalka, Dmanisi və Axmeta bələdiyyələrinin Sakrebulo-larında aralıq seçkilər keçiriləcək. 24News.ge xəbər verir ki, Mərkəzi Seçki Komissiyasının (MSK) sözçüsü Natia İoseliani bildirib ki, seçkilər majoritar sistem üzrə keçiriləcək. Seçicilər 4 majoritar Sakrebulo üzvünü seçəcəklər. Aralıq seçkilər üçün 4 seçki dairəsində ümumilikdə 7 seçki məntəqəsi yaradılıb. Onlardan 4-ü Tsalka bələdiyyəsində yerləşir. MSK-nın məlumatına görə, seçkilərdə həm elektron, həm də ənənəvi səsvermə modeli tətbiq olunacaq. Tsalka üzrə 3, Vani üzrə isə 1 məntəqədə elektron seçici verifikasiyası və səslərin hesablanması aparatlarından istifadə ediləcək. Seçkilərdə ümumilikdə 2 225 seçici iştirak edə bilər. 50 seçici daşınan seçki qutusu ilə səs vermək üçün müraciət edib. Seçkilər üçün iki siyasi partiyanın təqdim etdiyi 7 majoritar namizəd qeydə alınıb. Dmanisi, Tsalka və Vanidə “Gürcü Arzusu” və “Güclü Gürcüstan – Lelo”nun namizədləri, Axmetada isə yalnız “Gürcü Arzusu”nun namizədi qeydiyyatdan keçib. Seçki prosesini 7 yerli təşkilatın 56 müşahidəçisi izləyəcək. Seçkiləri 8 media təşkilatının 187 nümayəndəsi işıqlandıracaq. Səsvermə saat 08:00-da başlayacaq və 20:00-da başa çatacaq. Seçicilər seçki məntəqəsinə şəxsiyyət vəsiqəsi və ya Gürcüstan vətəndaşının pasportu ilə gəlməlidirlər. MSK seçicilərə xatırladıb ki, səsvermə gizlidir və seçki kabinəsində foto və video çəkilişinə icazə verilmir. Seçki günü MSK-nın əlaqə mərkəzi 2 51 00 51 nömrəsi ilə fəaliyyət göstərəcək. Media və seçki prosesində iştirak edən tərəflər üçün media mərkəzi də açıq olacaq.

www.24news.ge

Sabah 4 bələdiyyədə Sakrebulo üzrə aralıq seçkilər keçiriləcək

Digər xəbərlər