Gürcüstan və Türkiyə arasında təhsil sahəsində əməkdaşlıq haqqında saziş imzalanıb (FOTO)

Gürcüstan və Türkiyə hökumətləri arasında təhsil sahəsində əməkdaşlığın gücləndirilməsi məqsədilə saziş imzalanıb. 24News.ge xəbər verir ki, bu barədə Gürcüstanın Təhsil, Elm və Gənclər Nazirliyi məlumat yayıb. Sənədi Gürcüstanın Təhsil, Elm və Gənclər naziri Qivi Mikanadze və Türkiyənin milli təhsil naziri Yusuf Tekin imzalayıblar. Saziş çərçivəsində tərəflər təhsil sistemində yeni texnologiyaların tətbiqini və bu istiqamətdə təcrübə mübadiləsini təşviq edəcəklər. Həmçinin təhsil müəssisələri arasında əlaqələrin genişləndirilməsi, tələbələr, akademik heyət və tədqiqatçılar üçün mübadilə proqramlarının həyata keçirilməsi nəzərdə tutulur. Sənəddə təhsilin keyfiyyətinin təmin edilməsi mexanizmləri barədə məlumat mübadiləsi, birgə tədqiqat layihələrinin həyata keçirilməsi, eləcə də təhsil müəssisələrində gürcü və türk dillərinin öyrənilməsinin təşviqi də nəzərdə tutulub. Nazirliyin məlumatına görə, saziş iki ölkə arasında təhsil və mədəni əlaqələrin daha da dərinləşməsinə, şagirdlər və təhsil sahəsinin nümayəndələri üçün yeni imkanların yaradılmasına xidmət edəcək. Əməkdaşlıq çərçivəsində birgə işçi qrup da yaradılacaq. Qrupa Gürcüstan və Türkiyənin təhsil nazirləri və ya onların səlahiyyət verdiyi yüksək vəzifəli şəxslər həmsədrlik edəcəklər. İşçi qrup sazişdə nəzərdə tutulan təşəbbüslərin həyata keçirilməsini əlaqələndirəcək və əldə olunan nəticələrin qiymətləndirilməsi ilə məşğul olacaq.

www.24news.ge

Gürcüstan və Türkiyə arasında təhsil sahəsində əməkdaşlıq haqqında saziş imzalanıb (FOTO)

Digər xəbərlər