Sosial şəbəkədə şəkilləri paylaşaraq pul tələb edirlər – Vətəndaşlar nə etməlidir? (VİDEO)

Son dövürlər sosial şəbəkələr üzərindən vətəndaşlardan pul tələb edilməsi ilə bağlı oxşar hallar kütləvi xarakter alıb. 24News.ge xəbər portalına müsahibə verən vətəndaşlar bildiriblər ki, onların və yaxınlarının şəkilləri “TikTok” sosial şəbəkəsində paylaşılaraq qeyri-etik ifadələrdən istifadə olunub və bunun qarşılığında pul tələb edilib. Vətəndaşların sözlərinə görə, bəzi hallarda həmin şəxslər tələblərinə nail olaraq müəyyən məbləğdə pul əldə ediblər. Sosial dələduzluqla məşğul olduğu iddia edilən şəxslər isə müəyyən olunmamaq üçün müxtəlif üsullardan istifadə edirlər. Onlar tələb etdikləri pul vəsaitlərinin onlayn kazino hesablarına köçürülməsini tələb edərək kimliklərini gizlətməyə çalışırlar. İctimai fəal və siyasətçi Nərgiz Əliyeva da son dövrlər bu kimi halların artdığını və problemlə bağlı çoxsaylı vətəndaşların ona müraciət etdiyini bildirib. Nərgiz Əliyeva hüquq-mühafizə orqanlarının məsələyə laqeyd yanaşmamalı olduğunu qeyd edib. Onun sözlərinə görə, bu kimi hallara vaxtında müdaxilə edilmədiyi təqdirdə, analoji hallar daha da arta və cəmiyyətdə ciddi narahatlıq yarada bilər. Xəbər portalımızın suallarını cavablandıran hüquqşünas Rövşən Ziyadəliyev bildirib ki, vətəndaşlar ilk növbədə mümkün qədər çox sübut toplamalıdırlar. Onun sözlərinə görə, yazışmalar, ekran görüntüləri, səs və video materialları, eləcə də pul tələb edilməsi ilə bağlı digər məlumatlar sonrakı istintaq prosesində əhəmiyyətli ola bilər. Rövşən Ziyadəliyev belə hallarla qarşılaşan şəxslərin əsasən Kibercinayətkarlıqla Mübarizə Mərkəzinə müraciət etməli olduqlarını bildirib. Mövzu ilə bağlı daha ətraflı əməkdaşlarımızın hazırladığı reportajı təqdim edirik:

www.24news.ge

Sosial şəbəkədə şəkilləri paylaşaraq pul tələb edirlər – Vətəndaşlar nə etməlidir? (VİDEO)

Digər xəbərlər