Gürcüstanda terrorçuluqda ittiham edilərək saxlanılan şəxs ABŞ-a ekstradisiya olunub

ABŞ Ədliyyə Nazirliyi terrorizmlə mübarizədə əməkdaşlığa, Özbəkistan vətəndaşının saxlanılmasına və ABŞ-a ekstradisiya edilməsinə görə Gürcüstan Prokurorluğuna təşəkkür edib. 24News.ge xəbər verir ki, bu barədə ABŞ Ədliyyə Nazirliyinin rəsmi saytında məlumat yayılıb. Məlumata görə, 2026-cı ilin avqustunda Gürcüstan ərazisində ABŞ-da “Çayxana” (“Tea Party”) adı ilə tanınan şəxs saxlanılıb. O, “İslam Dövləti” (İşid) və “Əl-Nusra Cəbhəsi”nə maliyyə dəstəyi göstərmək və xarici döyüşçülər üçün yerli dəstək şəbəkəsini koordinasiya etməkdə ittiham olunur. ABŞ Ədliyyə Nazirliyinin məlumatında bildirilir ki, Davud Ansari Özbəkistan vətəndaşı və ABŞ-ın naturalizasiya yolu ilə vətəndaşlıq almış şəxsdir. O, həmçinin “Kozimjon Qafurov” və “Kozim” adları ilə tanınır. Ansari ABŞ və Gürcüstan arasında hüquqi əməkdaşlıq çərçivəsində Gürcüstan Prokurorluğu tərəfindən saxlanılıb və ABŞ-a təhvil verilib. Onun ekstradisiyası sentyabrın 23-də Tbilisidən Nyu-Yorkun Şərq Dairəsinə həyata keçirilib. ABŞ tərəfinin məlumatına görə, Ansari İşid və “Əl-Nusra Cəbhəsi”nə maddi dəstək göstərmənin bir epizodunda və bu məqsədlə sövdələşmənin təşkilində ittiham olunur. Nazirlik qeyd edib ki, cinayətlərin törədildiyi dövrdə hər iki təşkilat terrorçu təşkilat kimi tanınırdı. ABŞ Baş prokurorunun milli təhlükəsizlik məsələləri üzrə köməkçisi Con A. Ayzenberq bildirib ki, Ansari 10 il davam edən axtarışdan sonra ABŞ-a qaytarılıb. “Onun ekstradisiyasına və cinayət təqibinə imkan yaratdıqları üçün yerli və beynəlxalq tərəfdaşlarımıza təşəkkür edirik”, – deyə Ayzenberq bildirib. Məlumata görə, iş üzrə istintaqı Federal Təhqiqat Bürosu (FBI) aparıb. Araşdırmaya Nyu-York Polis Departamenti, Nyu-York Ştat Polisi, ABŞ Gömrük və Sərhəd Mühafizəsi Xidməti, Liman Administrasiyasının Polis Departamenti və ABŞ Marşal Xidməti də dəstək verib. ABŞ Ədliyyə Nazirliyinin Beynəlxalq İşlər İdarəsi, Tbilisidə FBI-nin hüquq-mühafizə məsələləri üzrə attaşe ofisi və Gürcüstan Prokurorluğu Ansarinin saxlanılması və ekstradisiyasını təmin edib. İttihama əsasən, Ansari 2016-cı ilin mayında, əlbir olduğu şəxslərdən birinin saxlanılmasından beş gün sonra ABŞ-ı tərk edərək Türkiyəyə qaçıb və bundan sonra uzun müddət gizlənib. İstintaqın məlumatına görə, Ansari Nyu-Yorkun Bruklin rayonunda fəaliyyət göstərən radikallaşmış şəxslərdən ibarət qrupa rəhbərlik edib. Qrup üzvlərinin Suriyaya gedərək İşid və ya Ansari sıralarında döyüşçü olmaq və ya gələcək döyüşçülərin səfərlərini maliyyələşdirmək niyyətində olduqları bildirilir. Araşdırma zamanı Suriyaya getmək və xarici terror təşkilatlarının sıralarında döyüşmək istəyən şəxslər üçün vəsait toplayan geniş maliyyə şəbəkəsinin mövcud olduğu müəyyən edilib. Şəbəkənin iştirakçıları qrupu “Çayxana” adlandırıblar. Məlumata görə, qrup həmçinin döyüşçülərin Suriyaya getdikdən sonra geridə qoyduğu ailələrə, eləcə də döyüşlərdə öldürülən şəxslərin dul qadınlarına və ailələrinə yardım üçün pul toplayıb. İstintaqın versiyasına əsasən, “Çayxana” tərəfindən toplanan vəsait hesabına Ansari və digər şəxslər 2013-cü ildə azı üç nəfərin Suriyaya getməsini maliyyələşdiriblər. Onlardan üçünün də Suriyada öldüyü ehtimal olunur. ABŞ Ədliyyə Nazirliyinin məlumatına görə, irəli sürülən ittihamlar məhkəmədə sübuta yetirilərsə, Ansarini maksimum 35 ilədək azadlıqdan məhrumetmə cəzası gözləyir.

www.24news.ge

Gürcüstanda terrorçuluqda ittiham edilərək saxlanılan şəxs ABŞ-a ekstradisiya olunub

Digər xəbərlər