კობახიძე: „გარეჯთან დაკავშირებული კამპანიები ანტისახელმწიფოებრივი ქმედებებია“

პრემიერ-მინისტრმა ირაკლი კობახიძემ გააკრიტიკა დავით გარეჯის საკითხთან დაკავშირებული ცნობების გარშემო აგორებული კამპანია და მას ანტისახელმწიფოებრივი ქმედება უწოდა. 24News.ge იუწყება, რომ კობახიძემ ჟურნალისტის კითხვაზე პასუხისას განაცხადა, რომ ბოლო პერიოდში ამ თემასთან დაკავშირებით „დაკვეთილი კამპანიის“ ნიშნები მკაფიოდ ჩანს და, მისი აზრით, აღნიშნული კამპანიები ცრუ ინფორმაციაზეა აგებული. კობახიძემ განაცხადა, რომ საქართველოს მთავრობის ყველა გადაწყვეტილება ღია და გამჭვირვალეა და ასეთ მგრძნობიარე საკითხებზე რაიმე შეთანხმების ფარულად მიღწევა შეუძლებელია. ის, რომ გარეჯის მიმართულებით საზღვრების დელიმიტაცია-დემაკარტაციასთან დაკავშირებით არც წერილობითი და არც ზეპირი შეთანხმება არ არსებობს, მანამდეც განაცხადა. პრემიერ-მინისტრმა აღნიშნა, რომ ქვეყანაში კორუფციასთან დაკავშირებით მრავალი პრობლემა იყო და ამ პრობლემების „ყალბი კამპანიებით“ გადაფარვა შეუძლებელია. კობახიძემ განაცხადა, რომ კამპანიების დამკვეთის ვინაობის შესახებ კონკრეტული ფაქტი არ აქვს. მისი თქმით, ის პირები, რომლებმაც კამპანიას მოგვიანებით პოლიტიკური ხასიათი მისცეს, საზოგადოებისთვის აშკარად ჩანს და ყველამ აქედან საკუთარი დასკვნა უნდა გამოიტანოს. პრემიერ-მინისტრმა დაამატა, რომ ისეთ მგრძნობიარე თემასთან დაკავშირებით გავრცელებულმა ინფორმაციამ, როგორიცაა გარეჯის საკითხი, შესაძლოა, სამართლებრივი მოკვლევა გამოიწვიოს. მან ხაზგასმით აღნიშნა, რომ ასეთი გადაწყვეტილება შესაბამისი სამართალდამცავი ორგანოების კომპეტენციაა.

www.24news.ge

კობახიძე: „გარეჯთან დაკავშირებული კამპანიები ანტისახელმწიფოებრივი ქმედებებია“

სხვა სიახლეები